प्रतिनिधिसभा बैठक आज बस्दै, नीति तथा कार्यक्रममाथि छलफल जारी रहने

काठमाडौँ । प्रतिनिधिसभाको बैठक आज बिहान ११ बजे बस्दैछ । बैठकमा सरकारको आगामी आर्थिक वर्ष २०८३/८४ को नीति तथा कार्यक्रममाथिको छलफललाई निरन्तरता दिइने भएको छ ।

राष्ट्रपति रामचन्द्र पौडेलले सोमबार संघीय संसद्को संयुक्त बैठकमा सरकारको नीति तथा कार्यक्रम प्रस्तुत गरेका थिए । त्यसयता सदनमा नीति तथा कार्यक्रममाथि पक्ष–विपक्षबीच तीव्र बहस भइरहेको छ ।

बुधबारको बैठक भने नियमित कार्यसूचीमा प्रवेश नै नगरी स्थगित भएको थियो । नीति तथा कार्यक्रममाथि उठेका प्रश्नको जवाफ दिन प्रधानमन्त्री स्वयं उपस्थित नभएको भन्दै प्रतिपक्षी दलका सांसदहरूले सदन अवरुद्ध गरेका थिए ।

आजको सम्भावित कार्यसूचीअनुसार प्रधानमन्त्रीले नीति तथा कार्यक्रममाथि सांसदहरूले उठाएका जिज्ञासा र प्रश्नहरूको जवाफ दिनेछन् । त्यसपछि नीति तथा कार्यक्रमलाई निर्णयार्थ प्रस्तुत गर्ने तयारी गरिएको संघीय संसद् सचिवालयले जनाएको छ ।

चालु अधिवेशनमा सरकारले आर्थिक वर्ष २०८३/८४ को वार्षिक बजेटसमेत प्रस्तुत गर्ने तयारी गरिरहेको छ । त्यसैले आजको बैठकलाई राजनीतिक र आर्थिक दृष्टिले महत्वपूर्ण मानिएको छ ।

यस्तै, राष्ट्रियसभाको बैठक पनि आज बिहान ११ः१५ बजे बस्ने तय भएको छ । उक्त बैठकमा पनि सरकारको नीति तथा कार्यक्रममाथिको छलफललाई निरन्तरता दिइने सम्भावित कार्यसूची रहेको छ ।

Facebook Comments Box