अख्तियारले ओलीका स्वकीय सचिव राजेश बज्राचार्यविरुद्ध अकुत सम्पत्ति सम्बन्धी अनुसन्धान अघि बढायो

काठमाडौं । अख्तियार दुरुपयोग अनुसन्धान आयोगले नेकपा एमालेका अध्यक्ष तथा पूर्वप्रधानमन्त्री केपी शर्मा ओलीका स्वकीय सचिव राजेश बज्राचार्यमाथि अकुत सम्पत्ति आर्जनको आशंकामा अनुसन्धान सुरु गरेको छ।

आयोगले बज्राचार्यलाई सम्पत्ति विवरण पेश गर्न निर्देशन दिएपछि उनले १३ पृष्ठको विस्तृत फारम भरेर आयोगमा बुझाएका छन्। स्रोतका अनुसार उक्त विवरण गत शुक्रबार बुझाइएको हो।

अख्तियारले प्रयोग गर्ने १३ पृष्ठे सम्पत्ति विवरण फारममार्फत स्रोत, आय, चल–अचल सम्पत्ति, बैंक मौज्दात तथा पारिवारिक सम्पत्तिबारे विस्तृत विवरण संकलन गरिन्छ। प्रारम्भिक विश्लेषणपछि सम्पत्तिको स्रोत पुष्टि हुन नसके भ्रष्टाचार निवारण ऐन, २०५९ अनुसार विशेष अदालतमा मुद्दा दायर गर्न सकिने कानुनी व्यवस्था रहेको छ।

बज्राचार्य यसअघि पनि नेपाल ट्रस्टअन्तर्गत दरबारमार्गस्थित जग्गा लिज प्रकरणसँग जोडिएका थिए। त्यतिबेला यति समूहअन्तर्गतको थामसेर्कु ट्रेकिङले उक्त जग्गा लिजमा लिँदा भएको भनिएको अनियमितताबारे अनुसन्धानका क्रममा उनको संलग्नताको विषय उठेको थियो।

त्यस्तै, केन्द्रीय अनुसन्धान ब्युरो (सीआईबी) को अनुसन्धान निष्कर्षअनुसार बज्राचार्य र उनकी पत्नी रश्मी शाक्यले यति समूहबाट भक्तपुरको बालकोटस्थित रोज भिलेज हाउजिङमा रहेको घर घुसस्वरूप प्राप्त गरेको आशंका गरिएको थियो। यद्यपि उक्त प्रकरणमा सरकारी वकिल कार्यालयले उनीविरुद्ध मुद्दा अघि नबढाउने निर्णय गरेको थियो।

पछि सीआईबीले २०८२ पुसमा थप अनुसन्धान आवश्यक रहेको निष्कर्षसहित अख्तियारलाई पत्राचार गरेपछि हाल आयोगले पुनः अनुसन्धान अघि बढाएको हो।

Facebook Comments Box