देशका विभिन्न प्रदेशमा बदली र चट्याङ्गसहित वर्षाको सम्भावना, तराईमा कतै तातो दिनको चेतावनी

काठमाडौँ ।

नेपालमा हाल उपल्लो वायुमण्डलमा पश्चिमी न्यून चापीय रेखा, स्थानीय वायु तथा पूर्वीय वायुको आंशिक प्रभाव रहेको मौसम पूर्वानुमान महाशाखाले जनाएको छ। सोही प्रभावका कारण देशका विभिन्न भूभागमा आंशिकदेखि सामान्य बदली तथा वर्षाको सम्भावना देखिएको छ।

आजको दिउँसोको मौसम अवस्था

आज दिउँसो कोशी, मधेस, बागमती र गण्डकी प्रदेशका हिमाली तथा पहाडी भूभागमा सामान्यतया बादल लाग्नेछ। त्यस्तै लुम्बिनी, कर्णाली र सुदूरपश्चिम प्रदेशका हिमाली र पहाडी क्षेत्रमा पनि आंशिकदेखि सामान्य बदली रहने अनुमान गरिएको छ।

तराई भूभागमा भने मौसम मिश्रित रहनेछ। कोशी र मधेस प्रदेशका तराई क्षेत्रमा आंशिक बादल लाग्नेछ भने बागमती, गण्डकी, लुम्बिनी र सुदूरपश्चिम प्रदेशका तराई क्षेत्रमा मौसम मुख्यतया सफा रहनेछ।

वर्षाको सम्भावना

कोशी प्रदेशका हिमाली तथा पहाडी क्षेत्रका केही स्थानहरूमा, साथै बागमती, गण्डकी, लुम्बिनी, कर्णाली र सुदूरपश्चिम प्रदेशका हिमाली तथा पहाडी क्षेत्रका एक–दुई स्थानमा चट्याङ्गसहित मध्यम वर्षाको सम्भावना रहेको छ।

त्यसैगरी कोशी र मधेस प्रदेशका तराई क्षेत्रका एक–दुई स्थानमा पनि चट्याङ्गसहित मध्यम वर्षा हुन सक्ने महाशाखाले जनाएको छ। लुम्बिनी र सुदूरपश्चिम प्रदेशका तराईका केही स्थान तथा बागमती र गण्डकी प्रदेशका तराईका थोरै स्थानमा तातो तथा गर्मी दिन रहने सम्भावना छ।

आज रातिको मौसम

आज राति कोशी प्रदेशमा सामान्यतया बादल लाग्नेछ। अन्य हिमाली र पहाडी भूभागमा आंशिक बदली रहनेछ भने तराई भूभागमा मौसम मुख्यतया सफा रहनेछ।

कोशी प्रदेशका हिमाली, पहाडी तथा तराईका थोरै स्थानहरूमा र बागमती तथा गण्डकी प्रदेशका हिमाली तथा पहाडी भूभागका एक–दुई स्थानमा चट्याङ्गसहित मध्यम वर्षाको सम्भावना रहेको महाशाखाले जनाएको छ।

Facebook Comments Box