बर्डफ्लु सङ्क्रमण पुष्टि भएपछि सदर चिडियाखाना अनिश्चितकालका लागि बन्द

काठमाडौँ । ललितपुरको जावलाखेलस्थित सदर चिडियाखाना आजदेखि अनिश्चितकालका लागि बन्द गरिएको छ। चिडियाखाना परिसरभित्र रहेका केही जीवजन्तुमा बर्डफ्लु (एभियन इन्फ्लुएन्जा) सङ्क्रमण पुष्टि भएपछि अर्को सूचना प्रकाशित नभएसम्मका लागि अवलोकन सेवा पूर्ण रूपमा स्थगित गरिएको हो।

चिडियाखाना प्रमुख सत्यनारायण साहका अनुसार सङ्क्रमण थप फैलिन नदिन तथा मानिसहरूमा हुन सक्ने सम्भावित जोखिम न्यूनीकरण गर्न तत्कालका लागि चिडियाखाना बन्द गर्ने निर्णय गरिएको हो।

राष्ट्रिय प्रकृति संरक्षण कोषअन्तर्गत सञ्चालित चिडियाखानाले सार्वजनिक सूचना जारी गर्दै पशुपन्छीहरूको स्वास्थ्य सुरक्षा, नियन्त्रण तथा निगरानीका लागि आवश्यक सतर्कता अपनाइएको जनाएको छ।

“चिडियाखानाभित्र रहेका पशुपन्छीहरूमा सङ्क्रमण थप फैलन नदिन र मानिसहरूमा हुन सक्ने सम्भावित जोखिम न्यूनीकरण गर्नका लागि तत्कालका लागि अवलोकनलाई पूर्ण रूपमा बन्द गरिएको हो,” प्रमुख साहले बताए।

चिडियाखाना प्रशासनले परिस्थितिको निरन्तर अनुगमन भइरहेको जनाउँदै आवश्यक परीक्षण, उपचार र नियन्त्रणका उपायहरू प्रभावकारी रूपमा अघि बढाइएको जनाएको छ। चिडियाखाना पुनः सञ्चालनबारे निर्णय अवस्था मूल्याङ्कनपछि सार्वजनिक गरिने बताइएको छ।

Facebook Comments Box