फिफाबाट एन्फा निलम्बित, नेपाली फुटबल पुनर्निर्माण गर्ने खेलकुद मन्त्रीको प्रतिबद्धता

काठमाडौं । अन्तर्राष्ट्रिय फुटबल महासंघ (फिफा) ले अखिल नेपाल फुटबल संघ (एन्फा) लाई निलम्बन गरेपछि शिक्षा तथा खेलकुद मन्त्री सस्मित पोखरेलले नेपाली फुटबलको पुनर्निर्माणका लागि पहल गर्ने प्रतिबद्धता जनाएका छन् ।

फिफा काउन्सिल ब्युरोले फिफा विधानको धारा १४ अनुसार एन्फालाई अर्को सूचना नआएसम्मका लागि निलम्बन गर्ने निर्णय गरेको हो । निलम्बनसँगै एन्फाले फिफा विधानअन्तर्गत पाउने सदस्यता अधिकारहरू गुमाएको छ ।

यो निर्णयपछि नेपाली राष्ट्रिय टोली तथा क्लबहरूले फिफा र एसियाली फुटबल महासंघ (एएफसी) अन्तर्गतका अन्तर्राष्ट्रिय प्रतियोगितामा सहभागी हुन पाउने छैनन् । साथै एन्फाले प्राप्त गर्दै आएको फिफा तथा एएफसीको आर्थिक सहयोग र विकास कार्यक्रमसमेत रोक्का हुने भएको छ ।

एन्फासँग आबद्ध पदाधिकारी तथा सदस्यहरूले पनि फिफा र एएफसीका तालिम, प्रशिक्षण तथा विकास कार्यक्रमहरूमा सहभागी हुन पाउने छैनन् ।

यसैबीच खेलकुद मन्त्री पोखरेलले वर्तमान तथा पूर्व राष्ट्रिय खेलाडीहरू र सरोकारवालासँग सहकार्य गर्दै नेपाली फुटबललाई नयाँ दिशातर्फ लैजाने बताएका छन् । उनले सामाजिक सञ्जालमार्फत संकट समाधानका लागि पहल सुरु भइसकेको जानकारी दिँदै नेपाली फुटबलको पुनर्निर्माण गर्ने प्रतिबद्धता व्यक्त गरेका छन् ।

Facebook Comments Box