सुन प्रकरण : पार्टीभित्र र बाहिरका जो भए पनि दोषी देखिए कारबाहीको दायरामा ल्याउछु -प्रधानमन्त्री

प्रधानमन्त्री पुष्पकमल दाहाल ‘प्रचण्ड’ले सुन तस्करी प्रकरणमा आफू नै दोषी देखिए पनि कारबाही भोग्न तयार रहेको बताएका छन् । माओवादीको बागमती प्रदेश समितिको पाँचौँ पूर्ण बैठकलाई सोमबार काठमाडौंमा सम्बोधन गर्दै प्रचण्डले पार्टीभित्र र बाहिरका जो भए पनि दोषी देखिए कारबाहीको दायरामा ल्याउने दोहोर्‍याएका हुन् ।

‘पार्टीभित्र र बाहिरका जोसुकै भए पनि दोषी देखिए कारबाही हुन्छ । सुन प्रकरणमा महराजीको नाम विभिन्न मिडियाले लेखेका छन् । छानबिन गर्न प्रहरी स्वतन्त्र छ । दोषी होइन भने सिआइबीले किन नाम उल्लेख गर्‍यो, दोषी हो भने किन कारबाही प्रक्रिया अघि बढाएन ? मिडियामा आएका विषयमा कत्तिको सत्यता छ ? प्रतिवेदनमा नाम पनि उल्लेख गर्ने अनि प्रमाण पुगेन भनेर कारबाही प्रक्रिया अगाडि नबढाउने किन ? मै दोषी देखिए पनि कारबाही भोग्न तयार छु,’ प्रचण्डको भनाइ उद्धृत गर्दै प्रदेश अध्यक्ष सरल सहयात्रीले भने । प्रधानमन्त्रीले सरकारभन्दा सुशासन, सामाजिक न्याय र समृद्धि बढी महत्वपूर्ण भएको भन्दै बेथितिविरुद्ध सरकार निर्मम रूपमा प्रस्तुत हुने बताए ।

Facebook Comments Box