रौतहट जिल्ला क्षेत्र नं. ३ मा कडा प्रतिस्पर्धा: प्रभु साह विरुद्ध पुनम यादव, ‘अबकी बार महिला सरकार’को लहर

रौतहट । झापाको जस्तै चुनावी माहोल अहिले रौतहट क्षेत्र नं. ३ मा पनि निकै रोचक बन्दै गएको छ। मधेश राजनीतिको ‘हेभीवेट’ मानिने र पूर्वमन्त्री प्रभु साहको बलियो पकड रहेको यस क्षेत्रमा यसपटक नेकपाकी उम्मेदवार पुनम यादवले चुनावी मैदानलाई कडा प्रतिस्पर्धात्मक बनाएकी छिन्।

लामो समयदेखि प्रभु साहको विरासत रहँदै आएको यस क्षेत्रमा स्वच्छ छवि र अन्तर्राष्ट्रिय पहिचान बनाएकी यादवको उदयले चुनावी अंकगणितमा फेरबदल ल्याउने संकेत देखिएको छ।

पुनम यादवको अन्तर्राष्ट्रिय छवि
पुनम यादव केवल एक राजनीतिक अनुहार मात्र नभई अन्तर्राष्ट्रिय स्तरमा आफ्नो प्रभाव जमाउन सफल नेतृ हुन्। उनलाई ‘कुरा भन्दा काम’ मा विश्वास गर्ने साहसी महिलाको रूपमा चिनिन्छ। उनको चर्चा विशेष गरी मुस्लिम राष्ट्र दुबईमा हनुमन्त कथा वाचन गराएपछि चुलिएको हो।

उनको सम्बन्ध दुबईको राजपरिवारदेखि भारतीय राजनीतिज्ञ र बलिउडका चर्चित कलाकारहरूसम्म रहेको बताइन्छ। यही विश्वव्यापी सम्बन्ध र अनुभवलाई उनले अहिले रौतहटको विकाससँग जोड्ने प्रतिबद्धता जनाउँदै आएकी छिन्।

“उनी यति साहसी छिन् कि उनलाई कुनै पनि काम असम्भव लाग्दैन। सबै धर्मलाई सम्मान गर्ने र सबैसँग समन्वय गर्न सक्ने क्षमता नै उनको मुख्य शक्ति हो,” क्षेत्र नं ३ का एक स्थानीय मतदाताले बताए।

अब्की बार महिला सरकार’ र जनलहर
रौतहट क्षेत्र नं ३ मा पहिलो पटक महिला उम्मेदवार बनेर चुनावी मैदानमा उत्रिएकी यादवले ‘अब्की बार महिला सरकार’ भन्ने नाराका साथ घरदैलो अभियानलाई तीव्रता दिएकी छिन्। चुनावी अभियानका क्रममा उनले पाएको जनसमर्थनले प्रभु साहको विरासतमाथि गम्भीर चुनौती थपेको छ।

पटक-पटक सांसद र मन्त्री बनिसकेका प्रभु साहलाई यसपटक आफ्नो ‘किल्ला’ जोगाउन निकै कसरत गर्नुपर्ने देखिएको छ। अर्कोतर्फ, नयाँ अनुहार र विकासको स्पष्ट खाकासहित आएकी यादवप्रति युवा र महिला मतदाताको आकर्षण बढ्दो छ। प्रभु साहको अनुभवी राजनीति र पुनम यादवको नयाँ ऊर्जाबीचको यो प्रतिस्पर्धा अहिले राष्ट्रिय राजनीतिकै चासोको विषय बनेको छ। के रौतहट ३ का जनताले वर्षौंदेखिको एउटै विरासतलाई निरन्तरता दिनेछन् वा पुनम यादवमार्फत नयाँ नेतृत्व छान्नेछन्? यसको फैसला आगामी निर्वाचनले गर्नेछ। तर, हालको माहोल हेर्दा रौतहट ३ मा यसपटक परिवर्तनको लहर निकै बलियो देखिएको छ।

Facebook Comments Box