कार्की आयोग प्रतिवेदन कार्यान्वयनपछि उपत्यकामा ‘हाई अलर्ट’ — गृहमन्त्री गुरुङद्वारा सुरक्षा प्रमुखहरूसँग आकस्मिक छलफल

काठमाडौँ । नवगठित मन्त्रिपरिषद्को पहिलो निर्णयले नै सुरक्षा संयन्त्रलाई उच्च सतर्कतामा उभ्याएको छ। गौरीबहादुर कार्की नेतृत्वको आयोगको प्रतिवेदन कार्यान्वयनमा लैजाने निर्णयसँगै काठमाडौँ उपत्यकाको सुरक्षा व्यवस्था कडा बनाइएको हो।

सरकारको यस निर्णयपछि उत्पन्न हुन सक्ने सम्भावित सुरक्षा चुनौतीको मूल्याङ्कन गर्दै नव–नियुक्त गृहमन्त्री सुधन गुरुङले सुरक्षा निकायका शीर्ष नेतृत्वसँग आकस्मिक छलफल सुरु गरेका छन्। उच्च सुरक्षा स्रोतका अनुसार, गृहमन्त्री गुरुङ, नेपाल प्रहरीका महानिरीक्षक (आईजीपी) दानबहादुर कार्की र सशस्त्र प्रहरी बलका महानिरीक्षक राजु अर्यालबीच नक्सालस्थित सशस्त्र प्रहरी प्रमुखको सरकारी निवासमा रणनीतिक बैठक जारी छ।

छलफलमा सम्भावित विरोध प्रदर्शन, राजनीतिक असन्तुष्टि र सुरक्षा जोखिमहरूको समग्र समीक्षा गर्दै एकीकृत सुरक्षा रणनीति तय गर्ने प्रयास भइरहेको जनाइएको छ।

यसअघि शुक्रबार साँझ नै नेपाल प्रहरी र सशस्त्र प्रहरी बल दुवैले मातहतका सबै इकाइहरूलाई ‘हाई अलर्ट’मा रहन निर्देशन दिइसकेका छन्। उपत्यकाका प्रमुख संवेदनशील क्षेत्रहरूमा सुरक्षा उपस्थिति बढाइएको छ भने सम्पूर्ण सुरक्षा युनिटहरूलाई तत्काल परिचालनका लागि तयारी अवस्थामा राखिएको छ।

बालेन शाह नेतृत्वको मन्त्रिपरिषद्को पहिलो बैठकले जेनजी आन्दोलनका क्रममा भएका घटनाबारे गठित आयोगको प्रतिवेदन कार्यान्वयन गर्ने निर्णय गरेपछि सुरक्षा संयन्त्र थप सक्रिय बनेको हो। उक्त प्रतिवेदन कार्यान्वयनले राजनीतिक र सडकस्तरमा नयाँ तरंग ल्याउन सक्ने आकलन गर्दै सुरक्षा निकायहरूले पूर्वतयारी तीव्र पारेका हुन्।

सरकारको निर्णयले शान्ति–सुरक्षा कायम राख्ने चुनौती थपिएको अवस्थामा सुरक्षा निकायहरू ‘प्रो–एक्टिभ’ रणनीतिमा केन्द्रित देखिएका छन्। आगामी दिनमा उपत्यकाको सुरक्षा अवस्था कस्तो मोड लिन्छ भन्ने विषय यतिबेला चासोको केन्द्र बनेको छ।

Facebook Comments Box