“ओली पक्राउपछि स्वास्थ्य परीक्षणका लागि अस्पतालमा राखिए”

काठमाडौं । नेकपा एमालेका अध्यक्ष तथा पूर्वप्रधानमन्त्री केपी शर्मा ओली लाई स्वास्थ्य परीक्षणका लागि त्रिवि शिक्षण अस्पताल लगिएको छ । अस्पतालको ‘रेड एरिया’को २७ नम्बर बेडमा राखिएका ओलीको स्वास्थ्य अवस्थाको विशेषज्ञ चिकित्सक टोलीले नजिकबाट निगरानी गरिरहेको छ ।

अस्पतालको ‘रेड एरिया’मा सामान्यतया जटिल र संवेदनशील अवस्थाका बिरामीलाई राखिने गरिन्छ । मिर्गौला प्रत्यारोपण गराइसकेका बिरामी रहेका कारण ओलीको स्वास्थ्य परीक्षणमा मिर्गौला रोग विशेषज्ञ (नेफ्रोलोजिस्ट) संलग्न हुने तयारी गरिएको अस्पताल स्रोतले जनाएको छ । प्रारम्भिक परीक्षणपछि चिकित्सकको सुझावअनुसार थप उपचार प्रक्रिया अघि बढाइनेछ ।

यसैबीच, ‘जेनजी आन्दोलन’ दमन गरेको आरोपमा फौजदारी कसुरमा कारबाही सिफारिस भएपछि प्रहरी टोलीले शनिबार बिहान भक्तपुरबाट उनलाई पक्राउ गरेको थियो । पक्राउपछि जिल्ला प्रहरी परिसर काठमाडौंमा राखिएका ओलीलाई स्वास्थ्य जाँचका लागि अस्पताल लगिएको हो ।

ओलीको पक्राउ र स्वास्थ्य अवस्थालाई लिएर देशको राजनीतिक वृत्तमा व्यापक चासो र प्रतिक्रिया देखिएको छ । उनका समर्थकहरूले पक्राउको विरोध जनाउँदै विभिन्न कार्यक्रम घोषणा गरेका छन् भने सुरक्षा व्यवस्था पनि कडा पारिएको छ ।

सरकार र सम्बन्धित निकायले कानुनी प्रक्रिया अनुसार अनुसन्धान अघि बढाइरहेको जनाइएको छ । ओलीको स्वास्थ्य अवस्था र आगामी कानुनी प्रक्रियाबारे थप विवरण आउन बाँकी छ ।

Facebook Comments Box