इस्लामाबादमा २१ घण्टा लामो वार्ता असफल अमेरिका–इरानबीच ‘रेड लाइन’ विवादले सहमति टुट्यो

इस्लामाबादमा अमेरिका–इरान शान्ति वार्ता निष्कर्षविहीन, ‘रेड लाइन’मै अडान कायम

एजेन्सी । पाकिस्तानको इस्लामाबादमा अमेरिका र इरानबीच भएको उच्चस्तरीय शान्ति वार्ता कुनै ठोस सहमति बिना नै टुंगिएको छ। लगातार २१ घण्टासम्म चलेको सघन छलफलपछि पनि दुवै पक्ष आ–आफ्ना अडानमा अडिग रहँदा वार्ता निष्कर्षविहीन बनेको हो।

वार्तापछि सञ्चारकर्मीहरूसँग कुरा गर्दै अमेरिकी उपराष्ट्रपति जेडी भान्सले इरानले अमेरिकाका ‘रेड लाइन’ स्वीकार गर्न अस्वीकार गरेको बताएका छन्।
“हामीले लचिलोपन देखायौँ, समय खर्चियौँ, तर इरानी पक्ष सहमत हुन तयार भएन,” उनले भने।

भान्सका अनुसार अमेरिकाले आफ्नो ‘अन्तिम र उत्कृष्ट’ प्रस्ताव प्रस्तुत गरिसकेको छ र अब निर्णय गर्ने जिम्मा इरानकै हातमा रहेको छ।

अमेरिकी प्रतिनिधिमण्डलमा जारेड कुश्नर र मध्यपूर्वका लागि विशेष दूत स्टिभ विट्कफ समेत सहभागी थिए। अमेरिकी पक्षले इरानको आणविक कार्यक्रम पूर्ण रूपमा रोक्नु नै आफ्नो प्रमुख उद्देश्य रहेको दोहोर्‍याएको छ।

यसैबीच, राष्ट्रपति डोनाल्ड ट्रम्प नेतृत्वको अमेरिकी प्रशासनले इरानले भविष्यमा कहिल्यै पनि परमाणु हतियार नबनाउने स्पष्ट प्रतिबद्धता नदिएसम्म कुनै सम्झौता सम्भव नहुने अडान पुनः दोहोर्‍याएको छ।

Facebook Comments Box