राजनीतिक आडमा हुने गुण्डागर्दीविरुद्ध प्रहरीको ‘जिरो टोलरेन्स’ : आईजीपी कार्कीको कडा निर्देशन

काठमाडौं । नेपाल प्रहरीका महानिरीक्षक दानबहादुर कार्कीले राजनीतिक संरक्षणको आडमा हुने गुण्डागर्दी तथा आपराधिक गतिविधिविरुद्ध देशव्यापी रूपमा कडा कारबाही अघि बढाउन मातहतका सम्पूर्ण प्रहरी इकाइलाई स्पष्ट निर्देशन दिएका छन्। हालै आयोजित आन्तरिक बैठकमा उनले ‘राजनीतिक पहुँच’ को दुरुपयोग गर्दै कानून मिच्ने जो–कोहीलाई पनि अब कुनै छुट नदिने चेतावनी दिएका हुन्।

आईजीपी कार्कीले शान्ति–सुरक्षा कायम गर्नु राज्यको मूल दायित्व भएको उल्लेख गर्दै पछिल्ला दिनमा केही समूहले राजनीतिक दल तथा नेताको नाम प्रयोग गरेर धम्की दिने, ढुंगामुढा गर्ने, फिरौती असुल्ने, तोडफोड गर्ने र सार्वजनिक सम्पत्तिमा क्षति पुर्‍याउने जस्ता गतिविधि बढेकोप्रति गम्भीर चिन्ता व्यक्त गरे। “कानूनभन्दा माथि कोही छैन,” भन्ने स्पष्ट सन्देश दिँदै उनले यस्ता गतिविधिमा संलग्न जो–कोहीलाई कानुनी दायरामा ल्याइने बताए।

प्रहरी प्रमुखले स्थानीय तहसम्मका प्रहरी इकाइलाई आपराधिक समूहहरूको अद्यावधिक विवरण तयार गर्न, सक्रिय गिरोहहरूको पहिचान गरी निगरानी बढाउन तथा कुनै पनि प्रकारको राजनीतिक दबाबमा नपरी निष्पक्ष रूपमा कानुनी प्रक्रिया अघि बढाउन निर्देशन दिएका छन्। उनले धरपकडदेखि मुद्दा दर्ता र अभियोजनसम्मका सबै प्रक्रिया प्रमाणमा आधारित, पारदर्शी र न्यायिक मापदण्डअनुसार हुनुपर्नेमा जोड दिए।

प्रहरी स्रोतका अनुसार राजधानीसहित संवेदनशील जिल्लाहरूमा छिट्टै विशेष अभियान सञ्चालन गरी असामाजिक तथा आपराधिक गतिविधिमा संलग्न व्यक्तिहरूलाई नियन्त्रणमा लिने तयारी गरिएको छ। यस अभियानले दीर्घकालीन रूपमा शान्ति–सुरक्षा सुदृढ गर्ने अपेक्षा गरिएको छ।

आईजीपी कार्कीको यो कडा सन्देशलाई कानून व्यवस्था मजबुत बनाउने दिशामा महत्वपूर्ण पहलका रूपमा हेरिएको छ। राजनीतिक संरक्षणमा सक्रिय गुण्डा समूह र तिनका संरक्षकहरूका लागि यो स्पष्ट चुनौती बनेको विश्लेषण गरिएको छ। साथै, यसले प्रहरी संगठनभित्र कार्यक्षमता र मनोबल अभिवृद्धि गर्नुका साथै आम नागरिकमा सुरक्षाप्रति विश्वास अझ सुदृढ हुने अपेक्षा गरिएको छ।

Facebook Comments Box