काठमाडौँ प्रहरीले ‘लुटेरा विरुद्ध विशेष अप्रेसन’ तीव्र बनायो : जडीबुटीमा गोली चल्दा एक लुटेरा घाइते

काठमाडौँ । जिल्ला प्रहरी परिसर काठमाडौँले जडीबुटी क्षेत्रमा लुटपाटमा संलग्न एक समूहविरुद्ध सञ्चालन गरेको विशेष अप्रेसनका क्रममा गोली चल्दा एक जना लुटेरा घाइते भएका छन् ।

शनिबार राति जडीबुटीस्थित रोयल पार्टी प्यालेस नजिकै प्रहरीले चलाएको अप्रेसनका क्रममा लुटेरा समूहले प्रहरी टोलीमाथि आक्रमण गर्न खोजेपछि जवाफी कारबाही स्वरूप एक राउन्ड गोली प्रहार गरिएको प्रहरीले जनाएको छ ।

उक्त घटनामा काठमाडौँको भद्रकाली घर भएका गणेश कार्की घाइते भएका छन् । उनको बायाँ खुट्टामा गोली लागेको जिल्ला प्रहरी परिसर काठमाडौँका अनुसार घाइते अवस्थामा उनलाई नियन्त्रणमा लिइएको छ ।

जिल्ला प्रहरी परिसर काठमाडौँका एसएसपी रमेश थापाका अनुसार मुठभेडका क्रममा एक जना प्रहरी कर्मचारी पनि घाइते भएका छन् । घाइते प्रहरीको अवस्था सामान्य रहेको बताइएको छ ।

एसएसपी थापाले पछिल्ला दिनहरूमा काठमाडौँ उपत्यकामा बढ्दै गएका श्रृंखलाबद्ध लुटपाट तथा चोरीका घटनालाई नियन्त्रण गर्न ‘लुटपाट विरुद्ध विशेष अप्रेसन’लाई थप तीव्र बनाइएको जानकारी दिए ।

प्रहरीले घटनासम्बन्धी थप अनुसन्धान भइरहेको जनाएको छ ।

Facebook Comments Box