लुम्बिनी र सुदूरपश्चिमका तराई क्षेत्रमा अझै केही दिन तातो मौसम कायमै रहने

काठमाडौं । मौसम पूर्वानुमान महाशाखाले लुम्बिनी र सुदूरपश्चिम प्रदेशका तराई क्षेत्रहरूमा बुधबारसम्म तातो दिनको अवस्था कायमै रहने जनाएको छ। यी क्षेत्रमा तापक्रम उच्च रहने भएकाले गर्मीको प्रभाव अझै केही दिन जारी रहने देखिएको छ।

महाशाखाका अनुसार आज, भोलि र पर्सिसम्म देशका अधिकांश पहाडी तथा हिमाली भू–भागमा आंशिकदेखि सामान्य बदली रहनेछ। साथै विभिन्न स्थानमा मेघगर्जन, चट्याङसहित वर्षा तथा उच्च हिमाली क्षेत्रमा हिमपातको सम्भावना रहेको छ।

आज कोशी, बागमती, गण्डकी र लुम्बिनी प्रदेशका पहाडी तथा हिमाली क्षेत्रमा मध्यम वर्षा हुन सक्ने अनुमान गरिएको छ। यस्तै कर्णाली र सुदूरपश्चिमका केही स्थानमा पनि वर्षा र हिमपातको सम्भावना रहेको महाशाखाले जनाएको छ।

त्यस्तै कोशी, मधेश, बागमती र गण्डकी प्रदेशका तराईका केही स्थानमा वर्षा हुन सक्ने पूर्वानुमान गरिएको छ।

भोलि र पर्सि पनि मौसममा धेरै परिवर्तन नहुने देखिएको छ। तर लुम्बिनी र सुदूरपश्चिमका तराई क्षेत्रमा पर्याप्त वर्षा नहुँदा तातो दिनको अवस्था अझै केही दिन कायम रहने सम्भावना रहेको महाशाखाले जनाएको छ।

महाशाखाले अत्यधिक गर्मीका कारण स्वास्थ्यमा असर पर्न सक्ने भएकाले घाममा लामो समय नबस्न, पर्याप्त पानी पिउन र आवश्यक सावधानी अपनाउन सर्वसाधारणलाई आग्रह गरेको छ।

Facebook Comments Box