खुकुरी देखाएर युवतीमाथि धम्की र कुटपिट, भिडियो सार्वजनिक भएपछि लागूऔषधसहित एक युवक पक्राउ

दाङ । सामाजिक सञ्जालमा खुकुरी देखाएर धम्की दिँदै कुटपिट गरेको भिडियो सार्वजनिक भएपछि दाङमा एक युवक लागूऔषधसहित पक्राउ परेका छन् ।

दाङको तुलसीपुर उपमहानगरपालिका–२ भंके निवासी २४ वर्षीय रमेश ठाडा मगरलाई इलाका प्रहरी कार्यालय तुलसीपुरको टोलीले आफ्नै घरबाट पक्राउ गरेको हो । उनको साथबाट विभिन्न प्रकारका लागूऔषधका ट्याब्लेटसमेत बरामद गरिएको जिल्ला प्रहरी कार्यालय दाङले जनाएको छ ।

प्रहरीका अनुसार मगरले एक युवतीलाई जंगलमा लगेर खुकुरी देखाई डर–धम्की दिँदै कुटपिट गर्नुका साथै आपत्तिजनक शब्द प्रयोग गरेको भिडियो सामाजिक सञ्जालमा सार्वजनिक भएको थियो । उक्त भिडियो भाइरल भएपछि घटनाले व्यापक सार्वजनिक ध्यानाकर्षण गरेको र सर्वसाधारणबाट कडा आलोचना भएको प्रहरीले जनाएको छ ।

घटनामा संलग्न रहेको आरोपमा २१ वर्षीय जिबराज खत्रीलाई पनि नियन्त्रणमा लिएर थप अनुसन्धान भइरहेको प्रहरीले जनाएको छ ।

Facebook Comments Box