शरीरमा मट्टीतेल छर्केर आत्मदाहको प्रयास गरेकी महिलाको मृत्यु

दार्चुला । शरीरमा मट्टीतेल छर्केर आत्मदाहको प्रयास गरेकी महिलाको मृत्यु भएको छ ।आइतबार बिहान शरीरमा आगो लगाएकी उनको उपचारका लागि धनगढी लैजाने क्रममा बाटोमै मृत्यु भएको हो ।शैल्यशिखर नगरपालिका-५ सेतकलाकी करिब ४५ वर्षीया सुना सुनारले आफ्नै शरीरमा आगो लगाएकी थिइन् । गोकुलेश्वर अस्पतालमा सामान्य उपचारपछि घाइते उनलाई थप उपचारका लागि धनगढी लैजाने क्रममा आइतबार साँझ बैतडीको पाटन पुग्ने बेला मृत्यु भएको प्रहरीले जनाएको छ ।
जिल्ला प्रहरी कार्यालय दार्चुलाका प्रवक्ता प्रहरी निरीक्षक ज्ञानेन्द्रबहादुर सिंहले घाइते उनको शरीरको घुँडाभन्दा माथिल्लो भाग जलेको जनाए । स्थानीयले आगो लागेको देखेपछि उद्धार गरेर गोकुलेश्वर अस्पताल पुर्‍याएका थिए । उनको शरीरको अधिकांश भाग जलेको थियो । उनले शरीरमा आगो लगाउनुको कारण खुलेको छैन ।

Facebook Comments Box