‘पुष्पा २’ ले उछिन्यो ‘जवान’ लाई

नयाँ दिल्ली । दक्षिण भारतीय स्टार अल्लु अर्जुनको फिल्म ‘पुष्पा २ः द रुल’को बक्स अफिसमा रफ्तार मत्थर हुने कुनै संकेत छैन । फिल्मले यतिबेला धुँवाधार कमाई गरिरहेको छ । भारतमा मात्रै नभएर विदेशमा पनि फिल्मको कमाई शानदार छ । रिलिज लगत्तै फिल्मले कयौं रेकर्ड तोडेको थियो । अब भने फिल्मले बलिउड स्टार शाहरुख खानको ‘जवान’को रेकर्ड तोडेको छ ।

माइक्रो ब्लगिङ वेबसाइट एक्सको एउटा पोष्टमा ट्रेड एनालिष्ट मनोबाला विजयबलनले पुष्पा २ को लटेस्ट विश्वव्यापी कलेक्शनबारे जानकारी दिएका छन् । अल्लुको फिल्मले १० औं दिन विश्वभर ८२ करोड ५६ लाख भारु कमाएको र अहिलेसम्म फिल्मको विश्वव्यापी कलेक्सन १ हजार २१८ करोड ४१ लाख भारु पुगेको बताएका छन् ।

तोड्यो ‘जवान’को रेकर्ड
अल्लु अर्जुनको ‘पुष्पा २ः द रुल’ले शाहरुख खानको सर्वाधिक कमाउने फिल्म ‘जवान’को लाइफटाइम कमाईको रेकर्ड तोडेको छ । बलिउड हंगामाको रिपोर्ट अनुसार सन् २०२३ मा रिलिज भएको ‘जवान’ले विश्वभर १ हजार १४८ करोड ३२ लाख भारु कलेक्सन गरेको थियो । ‘पुष्पा २ः द रुल’ ले प्रदर्शनको १० औं दिनमा जवानको यो रेकर्ड तोडेको छ ।

घरेलु बक्स अफिसमा ८ सय करोड माथि कमाई

घरेलु बक्स अफिसमा पनि अल्लु अर्जुनको ‘पुष्पा २ः द रुल’ ले राम्रो व्यापार गरिरहेको छ । ट्रेड वेबसाइट स्याकनिल्कको रिपोर्ट अनुसार फिल्मले भारतमा ८२५ करोड ५० लाख भारुको व्यापार गरेको छ । फिल्मको हिन्दी संस्करणले ४९८ करोड १० लाख भारु कमाएको छ । फिल्मले तेलुगुमा २६३ करोड ३५ लाख, हिन्दीमा ४५२ करोड १० करोड, तमिलमा ४५ करोड १० लाख भारु, कन्नडमा ५ करोड ९५ लाख भारु र मलयालम भाषामा १३ करोड भारु कमाएको छ ।

२०२४ को सबैभन्दा धेरै कमाउने फिल्म

‘पुष्पा २ः द रुल’ यस वर्षको अहिलेसम्मको अवधिमा सबैभन्दा धेरै कमाउने फिल्म बनेको छ । फिल्ममा रश्मिका मन्डना, फहद फाजिल, जगपति बाबु, सुनील र राव रमेश जस्ता कलाकारको महत्वपूर्ण भूमिका रहेको छ । फिल्मलाई सुकुमारले निर्देशन गरेका हुन् । यसअघि २०२१ मा फिल्मको पहिलो पार्ट आएको थियो ।

Facebook Comments Box