सार्वजनिक खरिद प्रणाली ह्याक प्रकरणमा निर्माण व्यवसायी गौली पक्राउ

काठमाडौँ । नेपाल प्रहरीको केन्द्रीय अनुसन्धान ब्यूरो (सीआईबी) ले सार्वजनिक खरिद प्रणालीमा अनियमितता गरेको आरोपमा निर्माण व्यवसायी ऋषिकेश गौलीलाई पक्राउ गरेको छ।

ब्यूरोका अनुसार सार्वजनिक खरिद अनुगमन कार्यालयको डाटा प्रणालीमा अनाधिकृत पहुँच बनाएर ठेक्का प्रक्रियामा हस्तक्षेप गरिएको उजुरीका आधारमा उनलाई नियन्त्रणमा लिइएको हो। आरोप अनुसार आर्थिक प्रस्ताव खोलिनुअघि नै सम्बन्धित डकुमेन्टहरू परिवर्तन गरिएको थियो, जसले प्रतिस्पर्धात्मक प्रक्रिया नै प्रभावित बनाएको आशंका गरिएको छ।

पक्राउ परेका गौली ‘आशिष निर्माण सेवा प्रालि’का सञ्चालक हुन्। उनलाई बुधबार काठमाडौँको पुरानो बानेश्वर क्षेत्रबाट पक्राउ गरिएको प्रहरीले जनाएको छ।

सीआईबीका प्रवक्ता प्रहरी उपरीक्षक शिवकुमार श्रेष्ठका अनुसार गौलीमाथि संगठित अपराध नियन्त्रण ऐन अन्तर्गत मुद्दा दर्ता गरी थप अनुसन्धान अघि बढाइएको छ।

उक्त प्रकरणमा हालसम्म १० जना निर्माण व्यवसायीसहित कुल १३ जना शंकास्पद व्यक्तिहरूलाई पक्राउ गरी अनुसन्धान भइरहेको ब्यूरोले जनाएको छ।

यस घटनाले सार्वजनिक खरिद प्रणालीको पारदर्शिता र सुरक्षा व्यवस्थामाथि गम्भीर प्रश्न उठाएको छ।

Facebook Comments Box