लागुऔषध कारोबारको विवादमा पोखरामा ग्याङ फाइट, एक महिलासहित ६ पक्राउ

पोखरा । पोखराको बागलुङ बसपार्क क्षेत्रमा गत वैशाख २२ गते राति भएको ग्याङ फाइट प्रकरणमा प्रहरीले एक महिलासहित ६ जनालाई पक्राउ गरेको छ।

सामाजिक सञ्जालमा घटनाको भिडियो सार्वजनिक भएपछि जिल्ला प्रहरी कार्यालय कास्की र वडा प्रहरी कार्यालय बगरको संयुक्त टोलीले घटनाबारे अनुसन्धान अघि बढाएको थियो। अनुसन्धानका क्रममा प्रहरीले वैशाख २६ गते पोखराका विभिन्न स्थानबाट संलग्न व्यक्तिहरूलाई नियन्त्रणमा लिएको जनाएको छ।

पक्राउ पर्नेहरूमा पोखरा–१३ बाझापाटनका २७ वर्षीय सुजन आले मगर, २३ वर्षीय राजेश परियार, गोरखा घर भई सोही स्थानमा बस्दै आएका ३० वर्षीय दिलेराम गुरुङ उर्फ ‘दिपेश’ रहेका छन्। यस्तै, बागलुङ बसपार्क क्षेत्रमा बस्दै आएका १८ वर्षीय सुजन तामाङ, २५ वर्षीय राजकुमार तामाङ तथा २० वर्षीया लिजा पुन पनि पक्राउ परेका छन्।

प्रहरीको प्रारम्भिक अनुसन्धानअनुसार समूहबीचको विवाद लागुऔषध कारोबारसँग सम्बन्धित रहेको खुलेको छ। घटनामा संलग्न अन्य व्यक्तिको खोजी भइरहेको प्रहरीले जनाएको छ।

जिल्ला प्रहरी कार्यालय कास्कीका सूचना अधिकारी प्रहरी नायव उपरीक्षक हरीबहादुर वस्नेतका अनुसार पक्राउ परेकामाथि थप अनुसन्धान तथा कानुनी प्रक्रिया अगाडि बढाइएको छ।

Facebook Comments Box