धनुषामा यात्रुवाहक बस दुर्घटना : चालकसहित १७ जना घाइते

धनुषा । पूर्व–पश्चिम राजमार्गअन्तर्गत धनुषाको मिथिला नगरपालिका–९ स्थित फुटबल ग्राउण्ड नजिक आज बिहान यात्रुवाहक बस दुर्घटना हुँदा चालकसहित १७ जना घाइते भएका छन् ।

प्रहरीका अनुसार काठमाडौँबाट विराटनगरतर्फ जाँदै गरेको बागमती प्रदेश ०१–००६ ख ५२३७ नम्बरको बस अर्को बसलाई उछिन्ने क्रममा अनियन्त्रित भई सडकमा पल्टिएको हो । दुर्घटनाका बेला बसमा ३३ जना यात्रु सवार रहेका थिए ।

दुर्घटनामा घाइते भएका सबैलाई तत्काल उद्धार गरी लालगढस्थित मोडल अस्पतालमा उपचारका लागि लगिएको प्रहरीले जनाएको छ । घाइतेमध्ये अधिकांशको अवस्था सामान्यदेखि मध्यम रहेको बताइएको छ ।

घटनापछि केही समय सडक क्षेत्रमा आवागमन प्रभावित बनेको थियो । प्रहरीले दुर्घटनाबारे थप अनुसन्धान अघि बढाएको जनाएको छ ।

Facebook Comments Box