पाँच पटकभन्दा बढी ट्राफिक नियम उल्लङ्घन गर्ने ३१ चालकको लाइसेन्स निलम्बन प्रक्रियामा

काठमाडौँ । ट्राफिक नियम बारम्बार उल्लङ्घन गर्ने सवारी चालकविरुद्ध उपत्यका ट्राफिक प्रहरीले कडा कदम चाल्न थालेको छ । ट्राफिक प्रहरीले एउटै कसुरमा पाँच पटकभन्दा बढी कारबाहीमा परेका ३१ जना चालकको लाइसेन्स निलम्बन गर्न यातायात व्यवस्था कार्यालयमा पत्राचार गरेको जनाएको छ ।

आइतबार आयोजित पत्रकार सम्मेलनमा उपत्यका ट्राफिक प्रहरी कार्यालयका प्रमुख एसएसपी ले पटक–पटक नियम उल्लङ्घन गर्ने चालकलाई अब सामान्य जरिवानामै सीमित नराखी लाइसेन्स निलम्बनसम्मको कारबाही अघि बढाइएको जानकारी दिए ।

उनका अनुसार ट्राफिक नियम पालना गराउने, दुर्घटना न्यूनीकरण गर्ने तथा सडक अनुशासन कायम गर्ने उद्देश्यले यस्तो कदम चालिएको हो । पछिल्लो समय सवारी चालकहरूले ट्राफिक नियमलाई बेवास्ता गर्दै दोहोर्‍याएर उल्लङ्घन गर्ने प्रवृत्ति बढेपछि प्रहरीले निगरानी थप कडा बनाएको जनाएको छ ।

यस्तै, सार्वजनिक यातायातका साधनमा सीसीटीभी क्यामेरा अनिवार्य गरिएको पनि प्रहरीले जनाएको छ । यात्रुको सुरक्षा, आपराधिक गतिविधि नियन्त्रण तथा दुर्घटना सम्बन्धी अनुसन्धानलाई प्रभावकारी बनाउन सार्वजनिक सवारीमा सीसीटीभी जडानलाई अनिवार्य गरिएको ट्राफिक प्रहरीको भनाइ छ ।

प्रहरीले ट्राफिक नियम उल्लङ्घन गर्ने चालकलाई अब कडा निगरानी र कडाभन्दा कडा कारबाही गरिने चेतावनी समेत दिएको छ ।

Facebook Comments Box