अत्यधिक गर्मी र ‘लु’ को प्रभाव: नेपालगन्जका सबै विद्यालय चार दिन बन्द

नेपालगन्ज । अत्यधिक गर्मी र तातो हावा ‘लु’ को प्रभाव बढ्दै गएपछि नेपालगन्ज उपमहानगरपालिकाभित्रका सबै विद्यालय चार दिनका लागि बन्द गरिएको छ।

उपमहानगरपालिकाको शिक्षा तथा खेलकुद महाशाखाले अत्यधिक तापक्रमका कारण पठनपाठन प्रभावित हुनुका साथै विद्यार्थीको स्वास्थ्यमा प्रतिकूल असर पर्ने जोखिम देखिएपछि यो निर्णय गरिएको जनाएको छ।

महाशाखा प्रमुख गोर्खबहादुर थापाका अनुसार सामुदायिक, संस्थागत तथा धार्मिक सबै विद्यालयमा २६ देखि २९ जेठसम्म पठनपाठन स्थगित गरिनेछ।

थापाले भने, “अत्यधिक गर्मीका कारण विद्यार्थीलाई विद्यालय आवतजावतमा कठिनाइ भई उनीहरूको स्वास्थ्यमा असर पर्ने जोखिम देखिएकाले, साथै जल तथा मौसम विज्ञान विभागलगायत सरोकारवालाको सुझावसमेतका आधारमा चार दिनका लागि विद्यालय बन्द गर्ने निर्णय गरिएको हो।”

यसअघि छिमेकी कोहलपुर नगरपालिकाले पनि गर्मी बढेपछि विद्यालय बिदा घोषणा गरिसकेको छ। कोहलपुरमा २५ देखि २७ जेठसम्म सबै विद्यालय बन्द गरिएको थियो।

Facebook Comments Box