एकैदिन १० हजार १०० रुपैयाँले घट्यो सुन, चाँदी पनि सस्तो

सुनमा एकैदिन १० हजार १०० रुपैयाँको गिरावट, चाँदी पनि सस्तो

काठमाडौं । नेपाली बजारमा बुधबार सुनचाँदीको मूल्यमा उल्लेखनीय गिरावट आएको छ। नेपाल सुनचाँदी व्यवसायी महासंघका अनुसार आज छापावाल सुनको मूल्य प्रतितोला १० हजार १०० रुपैयाँले घटेर २ लाख ९१ हजार ८ सय रुपैयाँ कायम भएको छ।

मंगलबार सुन प्रतितोला ३ लाख १ हजार ९ सय रुपैयाँ मा कारोबार भएको थियो। एकैदिनमा भएको यो गिरावटले पछिल्ला दिनहरूमा निरन्तर उतारचढाव देखिएको सुन बजारमा केही राहत महसुस गराएको छ।

यस्तै, चाँदीको मूल्य पनि घटेको छ। महासंघका अनुसार आज चाँदी प्रतितोला १८५ रुपैयाँले घटेर ४ हजार ७४० रुपैयाँ मा कारोबार भइरहेको छ। अघिल्लो दिन चाँदीको मूल्य प्रतितोला ४ हजार ९२५ रुपैयाँ रहेको थियो।

सुनचाँदीको मूल्यमा आएको यो गिरावट पछिल्लो समय देखिएको तीव्र वृद्धिपछि आएको हो। सरकारले आगामी आर्थिक वर्षका लागि सुनचाँदीमा लाग्ने भन्सार दर १० प्रतिशतले बढाउने घोषणा गरेपछि जेठ १७ गते सुनको मूल्य एकैदिन २० हजार ५ सय रुपैयाँले उकालो लागेको थियो।

यसअघि गत माघ १५ गते सुनको मूल्य प्रतितोला ३ लाख ३९ हजार ३ सय रुपैयाँ पुगेर नेपाली बजारको इतिहासमै सर्वाधिक उच्च रेकर्ड कायम गरेको थियो। सोही दिन चाँदीको मूल्य पनि ७ हजार ५०५ रुपैयाँ प्रतितोला पुगेर अहिलेसम्मकै उच्च विन्दुमा पुगेको थियो।

व्यवसायीहरूका अनुसार अन्तर्राष्ट्रिय बजारमा सुनको मूल्य, अमेरिकी डलरको विनिमय दर, विश्व अर्थतन्त्रको अवस्था तथा लगानीकर्ताको मनोविज्ञानजस्ता कारणले सुनचाँदीको मूल्यमा दैनिक उतारचढाव हुने गरेको छ। यही कारण पछिल्ला दिनहरूमा बजारमा कहिले तीव्र वृद्धि त कहिले उल्लेखनीय गिरावट देखिँदै आएको छ।

Facebook Comments Box