वैदेशिक रोजगारीमा जाने नेपालीको संख्या घट्यो, रेमिट्यान्स भने बढ्यो

काठमाडौं । चालु आर्थिक वर्ष २०८२/८३ को पहिलो ११ महिनामा वैदेशिक रोजगारीका लागि श्रम स्वीकृति लिने नेपाली युवाको संख्या घटेको छ।

वैदेशिक रोजगार विभागका अनुसार वैशाख मसान्तसम्म ७ लाख २२ हजार ८४१ जनाले वैदेशिक रोजगारीका लागि श्रम स्वीकृति लिएका छन्। यो संख्या अघिल्लो आर्थिक वर्षको सोही अवधिको तुलनामा ४.९९ प्रतिशत कम हो। गत वर्ष यही अवधिमा ७ लाख ६० हजार ३९१ जनाले श्रम स्वीकृति लिएका थिए।

विभागका अनुसार पश्चिम एसियामा उत्पन्न तनावपछि सरकारले केही देशका लागि श्रम अनुमति अस्थायी रूपमा रोक लगाउँदा वैदेशिक रोजगारीमा जानेको संख्या प्रभावित भएको हो।

जेठ महिनामा मात्रै ६१ हजार ७२ जनाले श्रम स्वीकृति लिएका छन्, जुन अघिल्लो वर्षको जेठको तुलनामा १७.९८ प्रतिशत कम हो। यसमध्ये २९ हजार ३७१ जना नयाँ श्रम स्वीकृति लिने र ३१ हजार ७०१ जना पुनःप्रवेश अनुमति लिने श्रमिक रहेका छन्।

जेठमा नेपाली श्रमिकका लागि मलेसिया प्रमुख गन्तव्य बनेको छ। मलेसियाका लागि १४ हजार १९२ जनाले श्रम स्वीकृति लिएका छन्। त्यस्तै यूएईमा १२ हजार ४५५, कतारमा १० हजार २१०, साउदी अरेबियामा ७ हजार ५१९ र रोमानियामा २ हजार ५१० जनाले अनुमति लिएका छन्।

यता वैदेशिक रोजगारीमा जानेको संख्या घटे पनि रेमिट्यान्स आप्रवाह भने बढेको छ। नेपाल राष्ट्र बैंकका अनुसार चालु आर्थिक वर्षको पहिलो १० महिनामा विप्रेषण आप्रवाह ४१.२ प्रतिशतले बढेर १९ खर्ब १६ अर्ब ९० करोड रुपैयाँ पुगेको छ।

Facebook Comments Box