हिमाली जिल्लाका विद्यालयलाई शिक्षामन्त्रीको निर्देशन: हिउँदे बिदा चाहनेले SMS मार्फत जानकारी दिनुपर्ने

काठमाडौं । शिक्षामन्त्री महाविर पुनले हिमाली जिल्लाका विद्यालय तथा स्थानीय तहलाई लक्षित गर्दै पठनपाठनको वार्षिक तालिका व्यवस्थापनबारे स्पष्ट निर्देशन दिएका छन्। मन्त्री पुनले सामाजिक सञ्जाल फेसबुकमार्फत स्टाटस सार्वजनिक गर्दै पुष–माघ महिनामा हिउँदे बिदा लिएर फाल्गुनदेखि मंसिरसम्म नियमित पठनपाठन सञ्चालन गर्न चाहने विद्यालय तथा स्थानीय पालिकालाई जिल्लाको नामसहित तुरुन्तै SMS गर्न आग्रह गरेका छन्।
मन्त्री पुनका अनुसार हिउँदमा अत्यधिक चिसो, हिमपात र भौगोलिक कठिनाइका कारण पठनपाठन प्रभावित हुने हिमाली जिल्लाका विद्यालयलाई लक्षित गर्दै यो व्यवस्था प्रस्ताव गरिएको हो। उनले उक्त व्यवस्थाअन्तर्गत हिउँदे बिदा लिएपछि वर्षे बिदा भने नपाइने स्पष्ट पारेका छन्।
शिक्षामन्त्री पुनले समय, भूगोल र स्थानीय आवश्यकतालाई ध्यानमा राखेर शिक्षण–सिकाइलाई प्रभावकारी बनाउन यस्तो लचकता अपनाइएको बताएका छन्। यसले विद्यार्थीको सिकाइमा निरन्तरता कायम राख्नुका साथै स्थानीय तहलाई आफ्नै परिस्थितिअनुसार शैक्षिक क्यालेन्डर व्यवस्थापन गर्न सहज हुने उनको विश्वास छ।

Facebook Comments Box