जनजागृति माविको ७५औँ वार्षिकोत्सव भव्य रूपमा सम्पन्न

सिन्धुपाल्चोक । चौतारा साँगाचोकगढी नगरपालिका–१२ स्थित जनजागृति माध्यमिक विद्यालयको ७५औँ वार्षिकोत्सव पूर्व मन्त्री तथा बागमती प्रदेश सभा सदस्य युवराज दुलालको प्रमुख आतिथ्यमा विविध कार्यक्रमसहित भव्य रूपमा सम्पन्न भएको छ।
वार्षिकोत्सव समारोहलाई सम्बोधन गर्दै प्रमुख अतिथि दुलालले जनजागृति माध्यमिक विद्यालयले ७५ वर्षसम्म शिक्षा क्षेत्रमा पुर्‍याएको योगदानको प्रशंसा गर्दै सामुदायिक विद्यालयको शैक्षिक गुणस्तर अभिवृद्धि आजको मुख्य आवश्यकता रहेको बताउनुभयो। उहाँले विद्यालयको शैक्षिक, भौतिक तथा व्यवस्थापकीय विकासका लागि प्रदेश सरकारको तर्फबाट सक्दो सहयोग रहने प्रतिबद्धता व्यक्त गर्नुभयो।
कार्यक्रममा विद्यार्थीहरूद्वारा प्रस्तुत गरिएको सांस्कृतिक नृत्य, गीत, वक्तृत्वकला तथा विविध सिर्जनात्मक प्रस्तुतिहरूले उपस्थित अभिभावक, शिक्षक तथा अतिथिहरूको मन जितेको थियो। साथै दीर्घकालीन योगदान पुर्‍याएका पूर्व शिक्षक, कर्मचारी तथा उत्कृष्ट विद्यार्थीहरूलाई सम्मान गरिएको थियो।
विद्यालय व्यवस्थापन समिति, शिक्षक, अभिभावक तथा स्थानीय समुदायको उल्लेखनीय सहभागितामा सम्पन्न उक्त कार्यक्रममा जनप्रतिनिधि, समाजसेवी र शिक्षा प्रेमीहरूको समेत उपस्थिति रहेको थियो।
७५ वर्षको गौरवशाली इतिहास बोकेको जनजागृति माध्यमिक विद्यालयले आगामी दिनमा अझ गुणस्तरीय र प्रतिस्पर्धी शिक्षा प्रदान गर्ने प्रतिबद्धता व्यक्त गरेको छ।

Facebook Comments Box