ठेचोमा दोस्रो गोदावरी नगरव्यापी खुला मेयर कप ब्याडमिन्टन प्रतियोगिता सुरु

ललितपुर । ७६औँ शहीद दिवसको अवसर पारेर ठेचो क्वागाः ब्याडमिन्टन क्लबको आयोजनामा दोस्रो गोदावरी नगरव्यापी खुला मेयर कप ब्याडमिन्टन प्रतियोगिता आज माघ १५ गतेदेखि ठेचोमा सुरु भएको छ।
गोदावरी नगरपालिकाका मेयर गजेन्द्र महर्जनको प्रमुख आतिथ्यतामा प्रतियोगिताको औपचारिक उद्घाटन गरिएको हो। उद्घाटन समारोहसँगै आज विभिन्न टिमबीच प्रतिस्पर्धात्मक खेलहरू सम्पन्न भएका छन्।
ठेचो क्वागाः ब्याडमिन्टन क्लबका अध्यक्ष रत्नमान मालीका अनुसार प्रतियोगितामा गोदावरी नगरपालिकाभित्रका ३८ जना खेलाडी सहभागी छन्। उद्घाटन खेलमा आयोजकका तर्फबाट राजु बस्नेत र अमर मालीको जोडी तथा लक्ष्मी कृष्ण महर्जन र दीपक लामाको जोडीबीच प्रतिस्पर्धा भएको थियो, जसमा लक्ष्मी कृष्ण महर्जन–दीपक लामाको जोडी विजयी भएको छ।
त्यस्तै, दोस्रो खेलमा आयोजककै पवन केसी र योगेश श्रेष्ठको जोडी तथा बडीखेलका सरदकुमार रेग्मी र वीरबहादुर नगरकोटीबीच प्रतिस्पर्धा भएको थियो। उक्त खेलमा पवन केसी–योगेश श्रेष्ठको जोडीले जित हात पारेको छ।
प्रतियोगितामा प्रथम हुने खेलाडीलाई नगद ४० हजार, दोस्रोलाई २५ हजार र तेस्रोलाई १५ हजार रुपैयाँ नगद पुरस्कारसहित सम्मान गरिने आयोजकले जनाएको छ।
गोदावरी नगरव्यापी दोस्रो खुला मेयर कप ब्याडमिन्टन प्रतियोगिताको मुख्य आयोजक ठेचो क्वागाः ब्याडमिन्टन क्लब रहेको छ भने गोदावरी नगरपालिका वडा नं. १२ सह–आयोजकका रूपमा रहेको छ। प्रतियोगिताले नगरस्तरमा खेलकुदको विकास, आपसी सद्भाव र प्रतिभा पहिचानमा महत्वपूर्ण योगदान पुर्‍याउने अपेक्षा गरिएको छ।

Facebook Comments Box