१३ गते शुक्रबार सपथ लिँदै बालेन्द्र साह—शुभ संकेत कि संयोग?

काठमाडौं । भावी प्रधानमन्त्रीका रूपमा जनमत प्राप्त गरेका बालेन्द्र साहले आउँदो १३ गते शुक्रबार पद तथा गोपनीयताको सपथ लिएर औपचारिक रूपमा जिम्मेवारी सम्हाल्ने तयारी गरेका छन्। उनको सपथ ग्रहण मिति र त्यससँग जोडिएका विश्वास तथा संयोगहरूले यतिबेला सार्वजनिक बहसलाई चासोको विषय बनाएको छ।
विश्वका केही देशहरू, विशेषगरी चिनियाँ समाजमा, १३ अंकलाई अशुभ मान्ने चलन रहेको पाइन्छ। यही कारणले कतिपय अन्तर्राष्ट्रिय होटलहरूमा १३ नम्बरका कोठा वा तलाहरू समेत राखिँदैनन्। रेस्टुरेन्टहरूमा पनि १३ नम्बरको टेबल प्रायः देखिँदैन।
अर्कोतर्फ, नेपाली सन्दर्भमा भने शुक्रबारलाई लिएर विभिन्न राजनीतिक उतारचढाव, काण्ड, तथा महत्वपूर्ण घटनाहरू घट्ने गरेको धारणा समय–समयमा उठ्ने गरेको छ। यस्तो पृष्ठभूमिमा १३ गते शुक्रबार सपथ लिनु संयोग मात्रै हो कि कुनै संकेत भन्ने प्रश्नले चर्चा पाएको छ।
संयोग नै सही, यसपटकको १३ गते शुक्रबार ‘रामनवमी’ पर्वसँग पनि जुधेको छ। भगवान रामको जन्मोत्सवका रूपमा मनाइने यस दिनलाई धार्मिक दृष्टिले अत्यन्त शुभ मानिन्छ। यस्तो पवित्र अवसरमा सपथ लिन लागेका साहले “रामराज्य” जस्तो सुशासनको आदर्शलाई आत्मसात् गर्ने अपेक्षा जनताले गरेका छन्।
अब हेर्न बाँकी छ—१३ गते शुक्रबारको यो मिति केवल संयोग सावित हुन्छ कि नयाँ राजनीतिक अध्यायको शुभ सुरुवात। जनता भने आशावादी छन् कि बालेन्द्र साहको नेतृत्वमा देशले स्थिरता, सुशासन र विकासको नयाँ दिशा कोर्नेछ।

Facebook Comments Box