धादिङ बैरेनीमा तीन सवारी एकै ठाउँ ठोक्किँदा ३७ घाइते

धादिङ । पृथ्वी राजमार्गअन्तर्गत धादिङको गल्छी गाउँपालिका–६ बैरेनीमा तीन वटा सवारी साधन एकै ठाउँ ठोक्किँदा ३७ जना घाइते भएका छन्।

गएराति साढे ११ बजे काठमाडौंबाट चितवनतर्फ जाँदै गरेको बागमती प्रदेश ०३–००१–००६ नम्बरको ट्रकलाई बागलुङतर्फ जाँदै गरेको बागमती प्रदेश ०१–००६ ख ७४९९ नम्बरको बसले पछाडिबाट ठक्कर दिएको थियो। त्यसपछि उक्त बसलाई वीरगञ्जतर्फ गइरहेको अर्को बसले पनि पछाडिबाट ठक्कर दिएको प्रहरीले जनाएको छ।

जिल्ला प्रहरी कार्यालय धादिङका सूचना अधिकारी तथा डीएसपी प्रकाश दाहालका अनुसार दुर्घटनामा तीन सवारीमा सवार ६८ यात्रुमध्ये ३७ जना घाइते भएका हुन्।

घाइतेमध्ये बैरेनी अस्पताल र स्मारिका मेडिकल हलमा उपचारपछि तीन जना डिस्चार्ज भइसकेका छन् भने बाँकी ३४ जनाको काठमाडौंका विभिन्न अस्पतालमा उपचार भइरहेको छ।

राति नै १९ जनालाई काठमाडौंको राष्ट्रिय ट्रमा सेन्टर र ९ जनालाई त्रिवि शिक्षण अस्पताल महाराजगञ्जमा पठाइएको थियो। थप ६ जनालाई स्थानीय उपचारपछि काठमाडौं रिफर गरिएको प्रहरीले जनाएको छ।

दुर्घटनामा संलग्न दुई वटा बस र ट्रकका चालकलाई प्रहरीले नियन्त्रणमा लिएको छ।

Facebook Comments Box