मन्त्रीको सचिवालयमा कार्यरत मुस्तकिम मियाँ अपहरण र लुटपाट आरोपमा पक्राउ

काठमाडौँ । श्रम, रोजगार तथा सामाजिक सुरक्षा मन्त्री रामजी यादवको सचिवालयमा कार्यरत मुस्तकिम मियाँ गम्भीर आपराधिक आरोपमा पक्राउ परेका छन् ।

सप्तरीको महादेवा गाउँपालिका–१ बल्थी स्थायी घर भई हाल राजविराज नगरपालिका–३ पाख्रेल टोल बस्दै आएका २७ वर्षीय मुस्तकिम मियाँलाई अपहरण तथा शरीर बन्धक सम्बन्धी कसुरमा सोमबार राजविराजबाट पक्राउ गरिएको हो । सप्तरीका प्रहरी प्रमुख एसपी गौतम केसीका अनुसार मियाँमाथि अपहरण, बन्धक बनाउने तथा लुटपाटमा संलग्न रहेको आरोप छ ।

प्रहरीका अनुसार २०८२ फागुन १४ गते बिहान राजविराज नगरपालिका–३ हनुमान चोकबाट राजु कुमार चौधरीलाई अपहरण गरिएको थियो । घटनाका बेला बा.९९ प ५७७५ नम्बरको मोटरसाइकलमा आएका मुस्तकिम मियाँसहितको समूहले बन्दुक देखाएर चौधरीलाई नियन्त्रणमा लिएको आरोप छ ।

पीडितको भनाइअनुसार उनलाई जबर्जस्ती राजविराज नगरपालिका–८ स्थित हिमालय राइस मिल पछाडिको सुनसान क्षेत्रमा लगेर बन्धक बनाइएको थियो । त्यहाँ कुटपिट गर्नुका साथै लुटपाटसमेत गरिएको आरोप छ ।

घटनामा संलग्न अन्य व्यक्तिको खोजी भइरहेको प्रहरीले जनाएको छ । पक्राउ परेका मियाँमाथि थप अनुसन्धान अघि बढाइएको जिल्ला प्रहरी कार्यालय सप्तरीले जनाएको छ ।

Facebook Comments Box