वीरगन्जका मेयर राजेशमान सिंह पक्राउ, लिखत सम्बन्धी कसुरमा अनुसन्धान जारी

वीरगन्ज । वीरगन्ज महानगरपालिकाका मेयर राजेशमान सिंह पक्राउ परेका छन् । जिल्ला अदालत पर्साबाट पक्राउ पुर्जी जारी भएको ८ दिनपछि पर्सा प्रहरीले उनलाई पक्राउ गरेको हो ।

जिल्ला प्रहरी कार्यालय पर्साका अनुसार विशेष सूचनाका आधारमा पर्साको ठोरी क्षेत्रबाट लुकीछिपी बसिरहेको अवस्थामा गरिएको अपरेसनमार्फत मेयर सिंहलाई पक्राउ गरिएको हो ।

प्रहरी प्रमुख सुदिपराज पाठकका अनुसार पक्राउ पुर्जी जारी भएपछि मेयर सिंह एक पटक अदालतमा उपस्थित भएका थिए । त्यसपछि उनी फरार रहेको र विशेष प्रहरी टोलीले निगरानीका क्रममा नियन्त्रणमा लिएको हो ।

गत १२ गते जिल्ला अदालत पर्साले लिखत सम्बन्धी कसुरमा मेयर सिंहसहित तीन जनाविरुद्ध पक्राउ पुर्जी जारी गरेको थियो । स्थानीय लियाकत अलीले दिएको जाहेरीका आधारमा अदालतले उक्त आदेश दिएको बताइएको छ ।

पक्राउ परेका मेयर सिंहलाई हाल जिल्ला प्रहरी कार्यालय पर्साको हिरासतमा राखी थप अनुसन्धान तथा सोधपुछ भइरहेको प्रहरीले जनाएको छ ।

Facebook Comments Box