आजको मौसम : पहाडमा वर्षा, तराईमा तातो लहरको जोखिम

काठमाडौं । नेपालमा हाल उपल्लो वायुमण्डलमा सक्रिय पश्चिमी न्यून चापीय रेखा तथा स्थानीय वायुको आंशिक प्रभावका कारण देशका विभिन्न क्षेत्रमा मौसममा परिवर्तन देखिएको छ। मौसम पूर्वानुमान महाशाखाका अनुसार आज पहाडी तथा हिमाली क्षेत्रमा वर्षाको सम्भावना रहँदा तराईका केही भूभागमा तातो लहरको प्रभाव कायम रहनेछ।

हाल कोशी, मधेस, बागमती र सुदूरपश्चिम प्रदेशसहित अधिकांश हिमाली तथा पहाडी क्षेत्रमा आंशिकदेखि सामान्य बदली रहेको छ भने तराईका अधिकांश स्थानमा मौसम मुख्यतया सफा रहेको महाशाखाले जनाएको छ।

आज दिउँसो कोशी प्रदेशसहित देशका हिमाली तथा पहाडी भूभागमा सामान्य बदली रहनेछ। लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्रका थोरै स्थानमा तथा मधेस, कोशी, बागमती र गण्डकी प्रदेशका तराईका एक–दुई स्थानमा चट्याङ्गसहित मध्यम वर्षा हुने सम्भावना रहेको छ।

यता, मधेस र लुम्बिनी प्रदेशका तराई क्षेत्रमा मध्यम स्तरको तातो लहर चल्ने सम्भावना रहेको छ। साथै कोशी, बागमती, गण्डकी र सुदूरपश्चिम प्रदेशका तराईका केही स्थानमा ‘तातो दिन’ रहने पूर्वानुमान गरिएको छ। महाशाखाले अत्यधिक गर्मीबाट बच्न आवश्यक सतर्कता अपनाउन सर्वसाधारणलाई आग्रह गरेको छ।

आज राति भने कोशी प्रदेशसहित हिमाली क्षेत्रमा सामान्य बदली रहनेछ भने पहाडी भूभाग तथा मधेस प्रदेशमा आंशिक बदली रहने अनुमान गरिएको छ। कोशी प्रदेशका केही स्थान तथा मधेस, बागमती, गण्डकी, लुम्बिनी र कर्णाली प्रदेशका हिमाली तथा पहाडी क्षेत्रका एक–दुई स्थानमा हल्का वर्षा हुन सक्ने महाशाखाले जनाएको छ।

मौसमविद्हरूका अनुसार आगामी केही दिन पहाडी क्षेत्रमा वर्षा र तराईमा गर्मी दुवैको प्रभाव देखिन सक्ने भएकाले दैनिक जनजीवन, कृषि तथा यातायातमा सतर्कता अपनाउनुपर्ने अवस्था रहेको छ।

Facebook Comments Box