धनगढीमा युवकको हत्या प्रकरणमा रहस्य खुल्यो, दुई जना पक्राउ, दुई फरार

धनगढी । कैलालीको धनगढीमा कुटपिटपछि एक युवकको हत्या गरिएको अवस्थामा शव फेला परेको घटनाको रहस्य खुलेको छ।

धनगढी उपमहानगरपालिका–९ त्रिवेणी घाटस्थित मोहना नदी किनारमा जेठ २४ गते बेवारिसे अवस्थामा फेला परेको शवको पहिचान खुलेसँगै घटना हत्या भएको पुष्टि भएको हो। प्रारम्भिक रूपमा नाम, थर र वतन नखुलेको उक्त शव कैलारी गाउँपालिका–९ गदरिया बस्ने २० वर्षीय राजकुमार रानाको रहेको प्रहरी अनुसन्धानबाट खुलेको छ।

प्रहरीका अनुसार रानाको प्राकृतिक मृत्यु नभई कुटपिट गरी हत्या गरिएको हो। अनुसन्धानका क्रममा धनगढी उपमहानगरपालिका–८ बस्ने ६० वर्षीय बम्मन राना, ५८ वर्षीया भँगु रानासहित चार जनाको समूहले उनलाई कुटपिट गरी हत्या गरेको पुष्टि भएको छ।

हत्या गरेपछि प्रमाण लुकाउने उद्देश्यले उनीहरूले शव मोहना नदी किनारमा फालेको प्रहरीले जनाएको छ।

घटनामा संलग्न रहेको आरोपमा ६० वर्षीय बम्मन राना र ५८ वर्षीया भँगु रानालाई प्रहरीले नियन्त्रणमा लिएको छ। उनीहरूविरुद्ध कर्तव्य ज्यान मुद्दा दर्ता गरी जिल्ला अदालतबाट म्याद थप गरेर हिरासतमा राखिएको छ।

घटनामा संलग्न भई फरार रहेका अन्य दुई जनाको खोजी कार्य तीव्र पारिएको प्रहरीले जनाएको छ।

Facebook Comments Box