मुद्दती निक्षेपको ब्याजदर थप घट्यो, औसत ४.२६ प्रतिशतमा झर्‍यो

काठमाडौँ । असार महिनाका लागि वाणिज्य बैंकहरूको मुद्दती निक्षेपको ब्याजदर थप घटेको छ। बैंकहरूले आइतबार सार्वजनिक गरेको नयाँ ब्याजदर सूचीअनुसार २० वटा वाणिज्य बैंकको औसत ब्याजदर ४.३४ प्रतिशतबाट घटेर ४.२६ प्रतिशतमा पुगेको छ।

व्यक्तिगत निक्षेपमा ब्याजदर घटाउने बैंकहरूमा एनएमबि बैंक, प्राइम कमर्सियल बैंक, हिमालयन बैंक, लक्ष्मी सनराइज बैंक, एनआईसी एशिया बैंक, स्ट्यान्डर्ड चार्टर्ड बैंक र कुमारी बैंक रहेका छन्।

एनएमबि बैंकले जेठमा ४.८ प्रतिशत रहेको ब्याजदर घटाएर ४.७५ प्रतिशत कायम गरेको छ। प्राइम कमर्सियल बैंकले ४.१५ प्रतिशतबाट घटाएर ४ प्रतिशतमा झारेको छ भने हिमालयन बैंकले ४.२५ प्रतिशतबाट ४ प्रतिशतमा पुर्‍याएको छ।

त्यसैगरी लक्ष्मी सनराइज बैंक र एनआईसी एशिया बैंकले ४.५ प्रतिशतबाट घटाएर ४ प्रतिशत कायम गरेका छन्। स्ट्यान्डर्ड चार्टर्ड बैंकको ब्याजदर ४ प्रतिशतबाट घटेर ३.९५ प्रतिशतमा झरेको छ भने कुमारी बैंकको ब्याजदर ३.९६ प्रतिशतबाट घटेर ३.९१ प्रतिशत कायम गरिएको छ।

बैंकहरूको निरन्तर घट्दो ब्याजदरले निक्षेपकर्ताको प्रतिफलमा थप दबाब परेको देखिएको छ।