किभमा रुसी हवाई हमला, १३ जनाको मृत्यु, ४० घाइते

काठमाडौं । युक्रेनको राजधानी किभमा रुसले गरेको पछिल्लो हवाई हमलामा कम्तीमा १३ जनाको मृत्यु भएको छ भने ४० जना घाइते भएका छन्। रातभर भएको हमलाका कारण राजधानीका विभिन्न क्षेत्रमा ठूलो क्षति पुगेको युक्रेनी अधिकारीहरूले बताएका छन्।

युक्रेनी अधिकारीहरूका अनुसार हमलामा किभका विभिन्न क्षेत्रमा रहेका अपार्टमेन्ट भवन तथा गोदामहरू प्रभावित भएका छन्। एउटा बालबालिकाको अस्पताल र विद्यालयमा समेत क्षति पुगेको जनाइएको छ।

युक्रेनका प्रधानमन्त्रीले पछिल्लो हमलामा मानवीय क्षति भएको बताएका छन्। लामो समयदेखि हवाई प्रतिरक्षा प्रणालीका लागि आवश्यक क्षेप्यास्त्रको अभाव झेलिरहेको युक्रेनका लागि पछिल्लो आक्रमणले राजधानीको सुरक्षा चुनौती थप गम्भीर बनाएको छ।

युक्रेनी राष्ट्रपति भोलोदिमिर जेलेन्स्कीले हवाई प्रतिरक्षाका लागि आवश्यक मिसाइलको अभावका कारण मानवीय क्षति बढेको बताएका छन्। युक्रेन आफ्नो हवाई सुरक्षाका लागि पश्चिमी मुलुकबाट प्राप्त सहयोगमा निर्भर रहँदै आएको छ।

किभका मेयर भिताली क्लित्स्कोले युक्रेनलाई थप गोलाबारुद तथा क्षेप्यास्त्र प्रतिरोधी प्रणाली आवश्यक रहेको बताएका छन्। उनले सहयोगी राष्ट्रहरूबाट थप सहयोग आवश्यक रहेकोमा जोड दिएका छन्।

पछिल्लो रुसी हवाई हमलाले रुस–युक्रेन युद्धका क्रममा राजधानी किभसहित सर्वसाधारणमाथिको सुरक्षा जोखिम र मानवीय संकट अझ गम्भीर बनेको देखाएको छ।

Facebook Comments Box