जिब्रो चिप्लिँदा विवाद: धादिङमा आशिका तामाङको अभिव्यक्ति सच्याउँदै सार्वजनिक माफी

धादिङमा रवि लामिछाने लाई स्वागत गर्ने कार्यक्रममा जिब्रो चिप्लिएपछि आशिका तामाङ ले सार्वजनिक रूपमा माफी मागेकी छन्। राष्ट्रिय स्वतन्त्र पार्टी (रास्वपा) धादिङकी उम्मेदवार तामाङले बोल्दा भएको शब्द त्रुटिप्रति खेद व्यक्त गर्दै भविष्यमा सजग रहने प्रतिबद्धता जनाएकी हुन्।
जिब्रो चिप्लिँदा उल्टो अर्थ लाग्ने शब्द उच्चारण
स्वागत मन्तव्यका क्रममा तामाङले “धादिङमा सुशासन स्थापना गरी, भ्रष्टाचार अन्त्य गर्न आएकी हुँ” भन्नुपर्नेमा अन्तिम शब्द स्पष्ट नदेख्दा “भ्रष्टाचार गर्छु” भन्ने आशय झल्किने शब्द उच्चारण भएको बताइन्। उनले छोटो समयमै मन्तव्य तयार पारेकाले पढ्दा आँखा नअड्किँदा उक्त त्रुटि भएको स्पष्ट पारिन्।
सार्वजनिक माफी र प्रतिबद्धता
घटनापछि उनले सामाजिक सञ्जालमार्फत् माफी माग्दै भनिन्,
“एकपटकको लागि गल्ती भयो। अबदेखि बोल्दा धेरै ध्यान दिएर मात्र बोल्नेछु र यस्तो गल्ती भविष्यमा दोहोरिन दिने छैन।”
उनले आफ्नो उद्देश्य सुशासन प्रवर्द्धन र भ्रष्टाचार अन्त्य नै रहेको स्पष्ट पार्दै अनपेक्षित शब्द त्रुटिले भ्रम सिर्जना गरेको उल्लेख गरिन्।

Facebook Comments Box