दक्षिणी क्यालिफोर्नियामा बी–५२ बमवर्षक विमान दुर्घटना, ८ जनाको मृत्यु

अमेरिका । दक्षिणी क्यालिफोर्नियास्थित एडवाड्र्स एयर फोर्स बेसबाट उड्नेबित्तिकै अमेरिकी वायुसेनाको बी–५२ बमवर्षक विमान दुर्घटनाग्रस्त हुँदा आठ जनाको मृत्यु भएको छ। मृतकमध्ये बोइङ कम्पनीका दुई कर्मचारी पनि रहेका छन्।

सोमबार स्थानीय समयअनुसार बिहान ११ः२० बजे नियमित परीक्षण उडानका क्रममा विमान दुर्घटना भएको हो। दुर्घटनापछि घटनास्थलबाट ठूलो मात्रामा कालो धुवाँको मुस्लो उठेको र टाढासम्म देखिएको बताइएको छ।

कर्नेल जेम्स हेय्सले घटनालाई ‘भयानक त्रासदी’ भन्दै यसमा सेना, सरकारी कर्मचारी तथा ठेकेदारहरू गरी आठ जनाको ज्यान गएको पुष्टि गरेका छन्। प्रारम्भिक जानकारीअनुसार दुर्घटनामा कोही पनि जीवित नबचेको बताइएको छ।

दुर्घटना एयर बेसभित्रको रनवे क्षेत्रमा भएको र उडान सुरु भएको केही समयमै विमानमा आगो लागेको जनाइएको छ। बी–५२ विमानले बेसको रडार आधुनिकीकरण कार्यक्रममा सहयोग गरिरहेको थियो।

अधिकारीहरूका अनुसार दुर्घटनाको कारण अझै खुल्न सकेको छैन। प्रारम्भिक अनुसन्धान पूरा हुन करिब ३० दिन र विस्तृत विश्लेषणका लागि छ महिनाभन्दा बढी समय लाग्न सक्ने अनुमान गरिएको छ।

बोइङ कम्पनीले आफ्ना दुई कर्मचारी विमानमा सवार रहेको पुष्टि गर्दै उनीहरूको परिवारसँग सम्पर्कमा रहेको जनाएको छ। क्यालिफोर्नियाका गभर्नर गेभिन न्युसमले घटनाप्रति दुःख व्यक्त गर्दै मृतकका परिवारप्रति समवेदना प्रकट गरेका छन्।

Facebook Comments Box