वैशाख कार्यसम्पादन मूल्याङ्कनमा बाँके प्रहरी देशभर प्रथम, एसपी अङ्गुर जिसी सम्मानित

काठमाडौँ / बाँके । वैशाख महिनाको कार्यसम्पादन मूल्याङ्कनमा बाँके जिल्ला प्रहरी कार्यालय देशभरमै सर्वोत्कृष्ट ठहरिएको छ। सोही मूल्याङ्कनमा लुम्बिनी प्रदेश प्रहरी कार्यालय प्रदेशतर्फ प्रथम भएको छ।

जिल्ला प्रहरी कार्यालय बाँकेका प्रमुख एसपी अङ्गुर जिसी उत्कृष्ट कार्यसम्पादनका आधारमा पुरस्कृत भएका छन्। लुम्बिनी प्रदेश प्रहरी कार्यालयको नेतृत्व डिआईजी भूपेन्द्रबहादुर खत्रीले गरिरहेका छन्।

कोहलपुर नगरपालिका क्षेत्रस्थित नगर विकास समितिको करिब २८ बिघा जग्गामा विगत दुई दशकदेखि भइरहेको अतिक्रमण नियन्त्रणमा लिन, शान्ति–सुरक्षाको प्रत्याभूति दिलाउन तथा कुनै पनि अप्रिय घटना हुन नदिन बाँके प्रहरीले महत्वपूर्ण भूमिका निर्वाह गरेको बताइएको छ।

प्रहरी सङ्गठनको नीति, निर्देशन तथा व्यावसायिक मूल्य–मान्यतालाई आत्मसात गर्दै अनुशासित र प्रभावकारी ढंगले जिम्मेवारी निर्वाह गरेकाले उक्त उपलब्धि हासिल भएको मूल्याङ्कन प्रतिवेदनमा उल्लेख छ।

एसपी जिसीको नेतृत्वपछि जिल्लामा शान्ति–सुरक्षाको अवस्था सुदृढ भएको, अपराध अनुसन्धान प्रभावकारी बनेको तथा नागरिकमैत्री सेवा प्रवाहमा सुधार आएको दाबी गरिएको छ।

प्रमुख उपलब्धिहरू

वैशाख महिनामा बाँके प्रहरीले हासिल गरेका मुख्य प्रगति यस प्रकार छन्:

कुल २०५ आपराधिक मुद्दा दर्ता गरी अनुसन्धान अघि बढाइएको
१० जघन्य तथा गम्भीर र ६१ मध्यम प्रकृतिका मुद्दा दर्ता
फैसला कार्यान्वयन अभियानअन्तर्गत ७६ फरार प्रतिवादी पक्राउ
१८७ चालु मुद्दाका प्रतिवादी नियन्त्रणमा
लामो समयदेखि थाती रहेका १९ मुद्दाको अनुसन्धान सम्पन्न
सीमावर्ती क्षेत्रमा अवैध नदीजन्य पदार्थ, काठ तथा भन्सार छलीका सामग्री बरामद गरी राजस्व संकलनमा योगदान

सफलताको कारण

नागरिकमैत्री प्रहरी सेवा र गुनासो सम्बोधनमा तीव्रता
अपराध अनुसन्धानमा आधुनिक प्रविधिको उपयोग
प्रभावकारी कमाण्ड र अनुशासनमार्फत मातहत युनिटहरूको सक्रियता

एसपी अङ्गुर जिसीले सम्मानलाई थप जिम्मेवारीका रूपमा लिँदै आगामी दिनमा नागरिक सुरक्षालाई अझ प्रभावकारी बनाउने प्रतिबद्धता व्यक्त गरेका छन्। जिल्लामा देखिएको यो प्रगतिले समग्र शान्ति–सुरक्षाको अवस्था सुधार हुँदै गएको संकेत गरेको छ।

Facebook Comments Box