रूपन्देहीमा स्पा र मसाज सेन्टरको नाममा अनैतिक धन्दा फस्टाउँदै

रूपन्देही । रूपन्देही जिल्लाका विभिन्न स्थानमा सञ्चालनमा रहेका स्पा सेन्टरहरूको नाममा अनैतिक धन्दा फस्टाएको खुलेको छ। पछिल्ला दिनमा स्थानीय प्रशासन र प्रहरीको संयुक्त अनुगमनका क्रममा केही स्पा सेन्टरहरूमा गैरकानुनी तथा अनैतिक गतिविधि हुँदै आएको पत्ता लागेको हो।
अनुगमनको क्रममा कतिपय स्पा सेन्टरहरूमा स्वास्थ्य र आरामदायी सेवा दिने नाममा यौन व्यवसाय लगायतका गतिविधि सञ्चालन भइरहेको भेटिएको प्रहरीले जनाएको छ। रूपन्देही प्रहरी प्रमुखका अनुसार, “स्पा व्यवसायको आडमा गरिने यस्ता गतिविधिहरू समाज र कानुन दुवैका लागि घातक छन्। दोषीमाथि कडा कानुनी कारबाही हुनेछ।”
अनुगमनमा संलग्न टोलीले केही केन्द्रबाट संदिग्ध व्यक्ति र सामग्रीहरू नियन्त्रणमा लिएको छ। प्रारम्भिक अनुसन्धानपछि ती स्पा सञ्चालकहरूलाई मानव बेचबिखन, यौन दुव्र्यवहार तथा शान्ति सुरक्षामा खलल पु¥याउने कार्यमा संलग्न भएको आशंकामा थप छानबिन भइरहेको जनाइएको छ।
यसरी केही व्यक्तिको लोभका कारण सम्पूर्ण स्पा व्यवसाय बदनाम हुन पुगेकोमा इमान्दार व्यवसायीहरूले चिन्ता व्यक्त गरेका छन्। उनीहरूले सरकारले यस्ता गैरकानुनी क्रियाकलाप नियन्त्रण गर्न कडा निगरानी राख्नुपर्नेमा जोड दिएका छन्।
सुरक्षा निकायले अबदेखि नियमितरूपमा निगरानी बढाउने र जनसहभागिता समेत आवश्यक रहेको बताएको छ। आम नागरिकलाई यस्ता कार्यबारे जानकारी भएमा तुरुन्तै प्रहरीलाई खबर गर्न अनुरोध गरिएको छ ।
हालका दिनहरूमा स्पा सेन्टरहरूको संख्या नेपालमा तीव्र रूपमा वृद्धि भइरहेको छ। यस्ता केन्द्रहरू शारीरिक स्फूर्ति र मानसिक शान्तिका लागि खोलिएको भए पनि केही स्थानमा यसलाई गलत कार्यहरूका लागि दुरुपयोग गरिएको देखिन्छ। विशेष गरी बालिकाहरूको प्रयोग बढ्दो हुनु चिन्ताजनक विषय बनेको छ।
कानूनी रूपमा १८ वर्षभन्दा मुनिका बालबालिकाहरू श्रमशक्ति रूपमा प्रयोग गर्न नपाइने भए तापनि केही स्पा सेन्टरहरूमा नाबालिग बालिकाहरूलाई काम गर्न बाध्य बनाइएको पाइन्छ। अझ गम्भीर कुरा त के छ भने, यस्ता स्थानहरूमा यौन शोषणजस्ता आपराधिक गतिविधिहरू पनि हुने गरेको विभिन्न अनुसन्धान र समाचारहरूले पुष्टि गरेका छन्।
यसले बालबालिकाको शिक्षा, स्वास्थ्य, मानसिक अवस्था र भविष्यमा गहिरो असर पारिरहेको छ। बाल अधिकारको गम्भीर उल्लङ्घन हुने यस्ता कार्यहरू तुरुन्त रोक्न आवश्यक छ। सरोकारवाला निकायहरू, स्थानीय प्रशासन, प्रहरी र समाज सेवासँग सम्बन्धित संस्थाहरू मिलेर यस्तो गैरकानूनी अभ्यासको निगरानी तथा नियन्त्रण गर्न अत्यन्त जरुरी छ।
यसका लागि सबै स्पा केन्द्रहरूमा समय–समयमा सरकारी अनुगमन गरिनु पर्छ। कामदारको उमेर प्रमाणपत्र अनिवार्य गरिनु पर्छ ताकि बालश्रम नहोस्। बालबालिकाको शोषण गर्ने सञ्चालकहरूलाई कडा कानुनी कारवाही गरिनु पर्छ।बाल अधिकार, श्रम अधिकार र यौन शोषणविरुद्ध स्थानीय तहमा व्यापक जनचेतना कार्यक्रम सञ्चालन गरिनु पर्छ।
अन्ततः, हाम्रो समाजमा बढ्दो यस्ता गतिविधिहरूले देशको नैतिकता, सुरक्षा र बालबालिकाको भविष्यमा गम्भीर असर पार्न सक्छ। त्यसैले यसप्रति सबैले गम्भीर भएर सोच्नु र काम गर्नु आवश्यक छ।

Facebook Comments Box