गृहमन्त्री नहुँदा रोकियो प्रहरी सरुवा, काठमाडौं कमाण्डका लागि एसएसपीहरूबीच तीव्र प्रतिस्पर्धा

काठमाडौँ । वैशाख ९ गते तत्कालीन गृहमन्त्री सुधन गुरुङले राजीनामा दिएपछि प्रधानमन्त्री वालेन्द्र (बालेन) शाहले गृह मन्त्रालयको जिम्मेवारी आफैं सम्हाल्दै आएका छन् । गृहमन्त्री रिक्त रहँदा नेपाल प्रहरीमा ठूलो संख्यामा सरुवा प्रक्रिया प्रभावित भएको छ ।

गत वर्ष सरुवा भएर विभिन्न जिल्लामा खटिएका तथा कार्यअवधि पूरा गरेका प्रहरी निरीक्षकदेखि वरिष्ठ उपरीक्षक (एसएसपी) सम्मका अधिकृतहरूको सरुवा रोकिएको हो । प्रहरी नियमावली २०७१ अनुसार प्रहरी अधिकृतहरूको सरुवा सामान्यतया एक वर्षमा गरिने व्यवस्था छ ।

प्रहरी प्रधान कार्यालयले २०८२ वैशाख १० गते ३११ जना प्रहरी निरीक्षक (इन्स्पेक्टर) को सरुवा गरेको थियो । तीमध्ये कार्यअवधि पूरा भएका २४ जनालाई चैत २ गते काज सरुवा गरिए पनि बाँकीको सरुवा अझै हुन सकेको छैन ।

त्यस्तै, गत वर्ष वैशाख १० मै १२१ जना डीएसपीको सरुवा गरिएको थियो । उनीहरूको अवधि सकिए पनि नयाँ जिम्मेवारी तोकिएको छैन । अघिल्लो वैशाखमा खटाइएका धेरै इन्स्पेक्टर र डीएसपी अहिले पनि विभिन्न जिल्लामा इन्चार्जकै भूमिकामा कार्यरत छन् ।

एक वर्षे कार्यकाल पूरा गरेका एसपीहरूको सरुवा पनि रोकिएको छ । बाग्लुङ, सिन्धुली, काभ्रे, सर्लाही, महोत्तरी, सुर्खेत, चितवन, पश्चिम नवलपरासी, कपिलवस्तु, कञ्चनपुर तथा सुदूरपश्चिम ट्राफिक प्रहरी कार्यालयमा कार्यरत एसपीहरूको अवधि पूरा भइसकेको छ ।

यसबीच, पाल्पामा खटाइएका एसपी पवन भट्टराईलाई जेनजी आन्दोलनपछि काठमाडौं फिर्ता ल्याइएको थियो ।

एसएसपी र डीआईजी हेरफेरको तयारी

प्रहरी प्रधान कार्यालयले एसएसपी र केही प्रदेश डीआईजीको समेत हेरफेर गर्ने तयारी गरिरहेको छ । प्रहरी प्रवक्ता डीआईजी अबि नारायण काफ्लेले सरुवा प्रक्रिया चलिरहेको बताएका छन।

उनले जनरक्षालाई भने, “अवधि पुगेका अधिकृतहरूको सरुवा प्रक्रियामै छ । सिलसिलेवार रूपमा रिपोर्टिङ गर्नुपर्ने विषयहरू छन् ।”

प्रहरी स्रोतका अनुसार सरुवाका लागि यसअघि तयार गरिएको मापदण्डलाई नै आधार बनाइएको छ । नेतृत्व परिवर्तनसँगै सरुवा मापदण्ड फेरिन सक्ने चर्चा भए पनि हाल मापदण्ड परिवर्तन नहुने संकेत प्रहरी नेतृत्वले दिएको छ ।

प्रहरी नियमावलीअनुसार एसपीसम्मको सरुवा निर्णय प्रहरी महानिरीक्षक (आईजीपी) ले गर्ने व्यवस्था छ भने एसएसपी र डीआईजी सरुवाको निर्णय गृहमन्त्रीबाट हुने प्रावधान छ ।

हाल गृह मन्त्रालयमा जेम्स कार्की स्वकीय सचिवका रूपमा कार्यरत छन् । प्रहरीका एक उच्च अधिकृतका अनुसार सरुवा सूची प्रधानमन्त्रीका प्रमुख स्वकीय सचिव सुवास शर्मासमक्ष पठाइसकिएको छ । तर प्रधानमन्त्री सचिवालयबाट अन्तिम सहमति नआएका कारण प्रक्रिया रोकिएको छ ।

एक उच्च प्रहरी अधिकृतले भने, “प्रधानमन्त्री सचिवालयबाट सहमति आएपछि सरुवा प्रक्रिया अघि बढ्छ ।”

काठमाडौं कमाण्डका लागि दौडधुप

जिल्ला प्रहरी परिसर काठमाडौंको नेतृत्व परिवर्तन गर्ने तयारी पनि प्रहरी प्रधान कार्यालयले थालेको छ । हाल परिसरको नेतृत्व एसएसपी रमेश थापाले गरिरहेका छन् । उपत्यका ट्राफिक प्रहरी कार्यालयको नेतृत्व परिवर्तन गर्ने गृहकार्यसमेत अघि बढाइएको स्रोत बताउँछ ।

काठमाडौं परिसरको कमाण्ड सम्हाल्न एसएसपीहरूबीच तीव्र प्रतिस्पर्धा सुरु भएको छ । एसएसपी दयानिधि ज्ञवाली, सुरेश काफ्ले, बीरबहादुर बुढा, सुवास बोहरा र अजय केसीले काठमाडौं जान रुचि देखाएका छन् ।

ज्ञवाली र बोहरा हाल प्रहरी प्रधान कार्यालयको कार्य विभागमा कार्यरत छन् । प्रतिनिधिसभा निर्वाचनपछिको रणनीतिक विश्लेषण गर्न गठित महाशाखाको नेतृत्व ज्ञवालीले गरेका थिए ।

जेनजी प्रदर्शनका क्रममा प्रहरी मुख्यालयको सुरक्षा व्यवस्थापनमा बोहरा र ज्ञवालीले सक्रिय भूमिका खेलेका थिए । विशेष ब्यूरोमा कार्यरत एसएसपी सुरेश काफ्लेले जेनजी आन्दोलन हिंसात्मक बनेपछि सर्वोच्च अदालतका न्यायाधीशहरूलाई सुरक्षित स्थानमा सार्न नेतृत्वदायी भूमिका निर्वाह गरेका थिए । त्यसबेला उनी सर्वोच्च अदालत सुरक्षा युनिटमा कार्यरत थिए ।

बीरबहादुर बुढा हाल अख्तियार दुरुपयोग अनुसन्धान आयोगमा कार्यरत छन् भने अजय केसी साइबर ब्यूरोमा कार्यरत छन् । काठमाडौं उपत्यका प्रहरी कार्यालयमा कार्यरत प्रविण धितालले पनि काठमाडौं परिसरको नेतृत्व लिन इच्छा देखाएको प्रहरी स्रोत बताउँछ ।

Facebook Comments Box