मनास्लु हिमाल आरोहणको ७० वर्ष पूरा, ऐतिहासिक उपलब्धिको स्मरण गर्दै विशेष कार्यक्रम

गोरखा । विश्वको आठौँ र नेपालको सातौँ अग्लो मनास्लु हिमालको सफल आरोहण भएको ७० वर्ष पूरा भएको छ । यस अवधिमा मनास्लुमा तीन हजार ६४३ भन्दा बढी आरोहीहरूले सफल आरोहण गरिसकेका छन् ।

इतिहासअनुसार सन् १९५६ मे ९ मा जापानी नागरिक तोसियो इमानिसी र भारतीय आरोही ग्याल्जेन नोर्बु शेर्पाले ८ हजार १६३ मिटर अग्लो मनास्लुमा पहिलो पटक मानव पाइला टेकेका थिए । त्यसपछि सन् १९७३ अप्रिल २२ मा नेपाली आरोही उर्केन छिरिङ शेर्पाले पहिलो पटक सफल आरोहण गरेका थिए, जसलाई नेपालको पर्वतारोहण इतिहासमा महत्वपूर्ण उपलब्धि मानिन्छ ।

७० वर्ष पूरा भएको अवसरमा गोरखा र मा विशेष कार्यक्रम आयोजना गरिएको छ । नेपाल पर्वतारोहण सङ्घ, मनास्लु संरक्षण क्षेत्र आयोजना र चुमनुब्री गाउँपालिकाको सहकार्यमा आयोजित कार्यक्रममा मनास्लुका प्रथम आरोही तोसियो इमानिसी र उर्केन छिरिङ शेर्पाको सालिक अनावरण गरिएको हो ।

कार्यक्रममा गण्डकी प्रदेशका मुख्यमन्त्री सुरेन्द्रराज पाण्डे, चुमनुब्री गाउँपालिका अध्यक्ष निमा लामालगायतले प्रथम आरोहीका परिवारका सदस्यहरूलाई सम्मान गरेका थिए । इमानिसीका छोरा कुनियो इमानिसी, नाति रसोयुके इमानिसी तथा नेपाली आरोही उर्केन छिरिङ शेर्पाका छोरा छिरिङ शेर्पालाई प्रमाणपत्र र दोसल्ला ओढाएर सम्मान गरिएको थियो ।

त्यसैगरी मनास्लुको काखमा रहेको चुमनुब्री–१ सामागाउँका प्रथम आरोही मिङ्मार छिरिङ लामा, साथै अन्य आरोहीहरू नाङ्स्याल छेदेन र डिकी लामालाई पनि सम्मान गरिएको छ ।

पर्वतारोहण सङ्घले पोखरामा आयोजना गरेको छुट्टै कार्यक्रममा मनास्लु हिमालको थ्री डी फोटोसमेत सार्वजनिक गरिएको छ ।

Facebook Comments Box