एपीजी प्रतिनिधिसँग आईजीपी दान कार्कीको भेट, सम्पत्ति शुद्धीकरण नियन्त्रणमा सहकार्य बढाउने विषयमा छलफल

काठमाडौं । प्रहरी महानिरीक्षक (आईजीपी) दान बहादुर कार्की र Asia Pacific Group on Money Laundering (APG) का डेपुटी एक्जिक्युटिभ सेक्रेटरी डेभिड श्यानन तथा पोलिसी अफिसर किया सासालबीच मंगलबार नेपाल प्रहरी प्रधान कार्यालयमा शिष्टाचार भेटघाट भएको छ ।

भेटघाटका क्रममा नेपाललाई सम्पत्ति शुद्धीकरण सम्बन्धी सघन निगरानीको सूची (ग्रे लिस्ट) बाट बाहिर ल्याउन सरकारले अघि सारेको कार्ययोजना कार्यान्वयनमा नेपाल प्रहरीको भूमिकाबारे विस्तृत छलफल भएको नेपाल प्रहरीले जनाएको छ ।

छलफलमा सम्पत्ति शुद्धीकरण निवारण प्रणालीलाई प्रभावकारी बनाउन अन्य सरोकारवाला निकायसँग नेपाल प्रहरीले गरिरहेको समन्वय, अनुसन्धान तथा कारबाहीका गतिविधिबारे समीक्षा गरिएको थियो । साथै प्रहरी कर्मचारीहरूको क्षमता अभिवृद्धि, प्राविधिक सहयोग विस्तार तथा आगामी कार्यदिशाका विषयमा समेत दुवै पक्षबीच व्यापक विचारविमर्श भएको बताइएको छ ।

सो अवसरमा वित्तीय अपराध नियन्त्रण, सूचना आदान–प्रदान, आपसी सहयोग तथा अन्तरनिकाय समन्वयलाई अझ प्रभावकारी बनाउने विषयमा समेत महत्वपूर्ण छलफल भएको थियो ।

नेपाललाई ग्रे लिस्टबाट बाहिर निकाल्न कानुन कार्यान्वयन निकायहरूको सक्रियता, वित्तीय पारदर्शिता तथा अनुसन्धान क्षमतामा सुधार आवश्यक रहेको सन्दर्भमा उक्त भेटलाई महत्वपूर्ण रूपमा हेरिएको छ ।

Facebook Comments Box