शेयर बजार लगातार पाँचौँ दिन घट्यो, नेप्से २ हजार ६४९ विन्दुमा झर्‍यो

काठमाडौं । नेपाली शेयर बजार लगातार पाँचौँ कारोबार दिन ओरालो लागेको छ। हप्ताको अन्तिम कारोबार दिन शुक्रबार नेप्से परिसूचक २ अंकले घट्दै २ हजार ६४९ दशमलव ५१ विन्दुमा पुगेको छ।

अघिल्लो शुक्रबार २ हजार ७०२ विन्दुमा रहेको नेप्से त्यसयता निरन्तर घटिरहेको हो। यसअघि सोमबार १ दशमलव ४६, मंगलबार २६ दशमलव १६, बुधबार १४ दशमलव ४५ र बिहीबार ८ दशमलव ५० अंकले नेप्से घटेको थियो।

आज होटल तथा पर्यटन, जलविद्युत्, म्युचुअल फन्ड, निर्जीवन बीमा र व्यापार समूहबाहेक अधिकांश समूहका सूचक घटेका छन्। कारोबार भएका कम्पनीमध्ये १७० वटाको शेयर मूल्य घट्दा ८५ वटा कम्पनीको शेयर बढेको छ भने २० कम्पनीको मूल्य स्थिर रहेको छ।

आज कालिका लघुवित्तको शेयर मूल्य १० प्रतिशतभन्दा धेरै घटेको छ। बजार सामान्य घटेको दिन स्नो रिभर्स, टक्सार पिखुवा खोला हाइड्रोपावर र याम्बलिङ हाइड्रोपावरको शेयर भने १५ प्रतिशतले बढेको छ।

नेप्से घटे पनि कारोबार रकम भने बढेको छ। बिहीबार २ अर्ब ८३ करोड रुपैयाँको कारोबार भएकोमा शुक्रबार ३५९ वटा कम्पनीका ७७ लाख २७ हजार कित्ता शेयर ३ अर्ब ९४ करोड रुपैयाँ बराबरमा किनबेच भएका छन्।

Facebook Comments Box