पेरुमा ६.७ म्याग्निच्युडको शक्तिशाली भूकम्प, ठूलो क्षतिको विवरण छैन

काठमाडौँ । दक्षिण अमेरिकी देश पेरुको मध्य क्षेत्रमा बिहीबार ६.७ म्याग्निच्युडको शक्तिशाली भूकम्प गएको छ। भूकम्पपछि स्थानीय बासिन्दा त्रसित हुँदै घरबाहिर सडकमा निस्किए पनि तत्काल मानवीय तथा भौतिक क्षतिको कुनै विवरण प्राप्त भएको छैन।

अमेरिकी भूगर्भ सर्वेक्षण (यूएसजीएस) का अनुसार भूकम्प जमिनको सतहबाट ९९ किलोमिटर गहिराइमा गएको थियो। यसको केन्द्रबिन्दु एन्डिज पर्वत क्षेत्रमा पर्ने एनिसोबाट करिब ३१ किलोमिटर उत्तरपश्चिममा रहेको जनाइएको छ।

भूकम्पको धक्का शक्तिशाली महसुस भएपछि स्थानीयवासीमा त्रास फैलिएको थियो। तर पेरुको जियोफिजिकल इन्स्टिच्युट (आईजीपी) का प्रमुख हर्नान्डो ताभेराले भूकम्प निकै गहिराइमा केन्द्रित भएकाले ठूलो क्षति हुनबाट देश जोगिएको बताएका छन्।

स्थानीय रेडियो आरपीपीसँग कुरा गर्दै ताभेराले भने, “चिन्ताका कारण मानिसहरू सडकमा निस्किए, तर कुनै प्रभाव परेको छैन।”

आईजीपीले सुरुमा भूकम्पको तीव्रता ७.२ म्याग्निच्युड रहेको जनाएको थियो। पछि यूएसजीएसले त्यसलाई संशोधन गर्दै ६.७ म्याग्निच्युड रहेको जनाएको हो।

विश्वको दोस्रो ठूलो तामा उत्पादक पेरु प्रशान्त महासागर वरपर फैलिएको अत्यन्त सक्रिय भूकम्पीय क्षेत्र ‘प्यासिफिक रिङ अफ फायर’ मा अवस्थित छ। विश्वभर हुने अधिकांश भूकम्पीय गतिविधि यही क्षेत्रमा केन्द्रित हुने गर्छन्।

भूकम्पपछि सरकारी तथा सम्बन्धित निकायले सम्भावित क्षति र त्यसबाट उत्पन्न हुन सक्ने जोखिमबारे निगरानी जारी राखेका छन्। अहिलेसम्म कुनै ठूलो मानवीय वा भौतिक क्षतिको पुष्टि भएको छैन।

Facebook Comments Box