सशस्त्र प्रहरीद्वारा अन्नपूर्ण बेसक्याम्पबाट १६२ पर्यटकको सफल उद्धार

काठमाडौँ । सशस्त्र प्रहरी बल नेपालले म्याग्दीको अन्नपूर्ण बेसक्याम्प (ABC) मा तीन दिनदेखि अलपत्र परेका १६२ जना नेपाली र विदेशी पर्यटकलाई सुरक्षित रूपमा उद्धार गरेको छ। निरन्तर हिमपात र हिउँ पहिरोका बीच सशस्त्र प्रहरीको उद्धार टोलीले बुधबार बिहानसम्म सबै पर्यटकलाई सुरक्षित स्थानमा ल्याएसँगै बेसक्याम्प क्षेत्र अहिले पूर्ण रूपमा खाली भएको छ।

सशस्त्र प्रहरी बल, विपद् व्यवस्थापन बेस नारच्याङ म्याग्दीबाट सशस्त्र प्रहरी निरीक्षक बिनोद पौडेलको कमाण्डमा गएको टोलीले कार्तिक ११ गतेदेखि उद्धार कार्य थालेको थियो। बाक्लो हिमपात र पहिरोले बाटो अवरुद्ध भएपछि टोलीले डोरी र उपकरणको सहायताले बाटो पहिल्याउँदै क्रमशः पर्यटकहरूलाई तल झार्ने कठिन कार्य गरेको हो।

पहिलो दिन मार्ग पहिचानमा समस्या हुँदा केही यात्रुहरूलाई फर्काइएको थियो भने कार्तिक १२ गते मात्रै ५२ जना पर्यटकलाई सुरक्षित स्थानमा पुर्‍याइएको थियो। उद्धारको अन्तिम चरणमा, आज बिहानसम्म थप १७ जना विदेशी पर्यटकसहित कुल १६२ जनालाई सुरक्षित स्थानमा ल्याइएपछि अभियान सफलतापूर्वक सम्पन्न भएको सशस्त्र प्रहरी बलले जनाएको छ।

उद्धार गरिएका पर्यटकहरूलाई अन्नपूर्ण गाउँपालिका–४ का गुफाफाँट, सादिखर्क लगायत हिमपातमुक्त क्षेत्रमा राखिएको छ। उनीहरूमध्ये केहीमा सास फेर्न गाह्रो हुने, टाउको दुख्ने र चिसोका कारण हल्का ज्वरो देखिएको भए पनि कसैको अवस्था गम्भीर छैन।

उद्धारका क्रममा माथिल्लो क्षेत्रमा सञ्चार सम्पर्क पूर्ण रूपमा अवरुद्ध हुँदा कठिनाइ थपिएको थियो। यद्यपि सशस्त्र प्रहरीका अनुसार साँझसम्म सबै पर्यटक आफ्ना परिवारसँग सम्पर्कमा आइपुगेका छन्।

सशस्त्र प्रहरी बलका प्रवक्ताले हिमाली क्षेत्रमा हाल निरन्तर हिमपात र पहिरो भइरहेको भन्दै आवश्यक पूर्वतयारी र जानकारीबिना त्यहाँ नजान सर्वसाधारण र पर्यटकहरूलाई अनुरोध गरेका छन्। हिउँ स्थिर नभएसम्म अन्नपूर्ण क्षेत्रमा ट्रेकिङ र आरोहण गतिविधि अस्थायी रूपमा रोकिएको छ।

तीन दिन निरन्तर जोखिम मोल्दै सम्पन्न गरिएको यस उद्धार अभियानलाई स्थानीय प्रशासन, पर्यटन व्यवसायी र गाइड संघहरूले “राष्ट्रिय गौरवको कार्य” का रूपमा व्याख्या गरेका छन्।
म्याग्दी जिल्ला प्रशासन कार्यालयले सशस्त्र प्रहरी निरीक्षक पौडेल र उनकी टोलीको साहस, संयम र जिम्मेवारीपूर्ण कार्यप्रति विशेष धन्यवाद जनाएको छ।

हाल अन्नपूर्ण बेसक्याम्प क्षेत्र पूर्ण रूपमा खाली गरिएको छ र मौसम स्थिर नभएसम्म पर्यटक आवागमन रोकिएको सशस्त्र प्रहरीले जनाएको छ। उद्धार कार्यमा अन्नपूर्ण गाउँपालिका, जिल्ला प्रशासन म्याग्दी, नेपाल पर्यटन बोर्ड र स्थानीय ट्रेकिङ गाइड संघको सक्रिय सहयोग रहेको थियो।

Facebook Comments Box