आईजीपी दान बहादुर कार्कीद्वारा ८ जना प्रहरी अधिकृतलाई दर्ज्यानी चिन्ह प्रदान

काठमाडौं । नेपाल प्रहरीका प्रहरी महानिरीक्षक (आईजीपी) दान बहादुर कार्कीले पदोन्नति प्राप्त गरेका ८ जना प्रहरी अधिकृतहरूलाई दर्ज्यानी चिन्ह प्रदान गर्नुभएको छ ।

नेपाल प्रहरी प्रधान कार्यालयमा बुधबार आयोजित विशेष समारोहमा आईजीपी कार्कीले पदोन्नति भएका प्रहरी अधिकृतहरूलाई दर्ज्यानी चिन्हद्वारा सुशोभन गर्नुभएको हो ।

नेपाल सरकार, गृह मन्त्रालयको २०८२ पुस २ गतेको निर्णयअनुसार प्राविधिक प्रहरी उपरीक्षकबाट प्राविधिक प्रहरी वरिष्ठ उपरीक्षक पदमा १ जना, गृह मन्त्रालय (सचिवस्तर) को सोही मितिको निर्णयअनुसार प्राविधिक प्रहरी नायव उपरीक्षकबाट प्रहरी उपरीक्षक पदमा ३ जना तथा प्राविधिक प्रहरी निरीक्षकबाट प्राविधिक प्रहरी नायव उपरीक्षक पदमा ४ जना गरी जम्मा ८ जना प्रहरी अधिकृतहरू पदोन्नति हुनुभएको हो ।

दर्ज्यानी चिन्ह सुशोभन समारोहलाई सम्बोधन गर्दै आईजीपी कार्कीले पदोन्नति प्राप्त प्रहरी अधिकृतहरूलाई बधाई तथा सफल कार्यकालको शुभकामना व्यक्त गर्नुभयो । उहाँले प्रहरी संगठनको प्राविधिक समूहमा रही व्यावसायिक निष्ठा, इमानदारी र जिम्मेवारीपूर्वक कार्य सम्पादन गरेको मूल्याङ्कनका आधारमा पदोन्नति भएको उल्लेख गर्दै आगामी दिनमा अझ बढी उत्प्रेरित भई संगठनको सुदृढीकरणमा योगदान पुर्‍याउन निर्देशन दिनुभयो ।

आईजीपी कार्कीले प्रहरी कर्मचारीहरूको बोली, व्यवहार र आचरण नागरिकमैत्री तथा गुणस्तरीय हुनुपर्नेमा जोड दिँदै नागरिकका समस्या समाधानमा संवेदनशील भई उच्च मनोबल, सामूहिक भावना, सकारात्मक सोच र इमानदारीका साथ जिम्मेवारी निर्वाह गर्न निर्देशन दिनुभयो ।

साथै, आसन्न निर्वाचनलाई मध्यनजर गर्दै सम्भावित सुरक्षा चुनौतीहरूलाई समयमै सम्बोधन गर्न स्थानीय तह, सुरक्षा निकाय तथा सरोकारवाला संस्थासँग समन्वय र सहकार्य गर्दै प्रभावकारी सुरक्षा रणनीति अवलम्बन गर्नुपर्ने उहाँको भनाइ थियो ।

Facebook Comments Box