खुलामञ्चमा विशेष कार्यक्रमसहित २८औँ राष्ट्रिय भूकम्प सुरक्षा दिवस मनाइयो

काठमाडौँ । विसं १९९० माघ २ गते दिउँसो २ः२४ बजे गएको विनाशकारी भूकम्पको स्मृतिमा माघ २ गते देशभर विभिन्न कार्यक्रम आयोजना गरी २८औँ राष्ट्रिय भूकम्प सुरक्षा दिवस भव्य रूपमा मनाइएको छ।
यस अवसरमा काठमाडौँको खुलामञ्चमा विशेष कार्यक्रम आयोजना गरिएको थियो। कार्यक्रममा भूकम्पबाट ज्यान गुमाएका नागरिकप्रति श्रद्धाञ्जली अर्पण गर्नुका साथै भविष्यमा आउनसक्ने भूकम्पबाट हुने क्षति न्यूनीकरणका उपायबारे जनचेतनामूलक सन्देश प्रवाह गरिएको थियो। विद्यालयस्तरीय सचेतना कार्यक्रम, विपद् पूर्वतयारी अभ्यास, प्रदर्शनी तथा अन्तरक्रियात्मक कार्यक्रमहरू पनि सञ्चालन गरिएका थिए।
विसं २०५५ सालदेखि प्रत्येक वर्ष माघ २ गतेलाई राष्ट्रिय भूकम्प सुरक्षा दिवसका रूपमा मनाउँदै आइएको छ। भूकम्पीय जोखिम उच्च रहेको नेपालमा सुरक्षित संरचना निर्माण, आपतकालीन तयारी, तथा नागरिकस्तरमा सचेतना अभिवृद्धि गर्ने उद्देश्यले सरकारले यो दिवस मनाउन थालेको हो।
कार्यक्रममा वक्ताहरूले भूकम्प अकल्पनीय भए पनि त्यसबाट हुने क्षति न्यूनीकरण गर्न सकिने भन्दै भवन संहिता कार्यान्वयन, सामुदायिक तयारी र नियमित अभ्यास अपरिहार्य रहेकोमा जोड दिएका छन्। “सचेत नागरिक, सुरक्षित संरचना” नै भूकम्प सुरक्षाको मूल आधार भएको सन्देशका साथ यस वर्षको दिवस सम्पन्न भएको छ।

Facebook Comments Box