नाना, खाना, छाना गुमेको प्रहरी– ‘माओवादी युद्धमा पनि यस्तो ज्यादती भोगिएन’

काठमाडौं- जेनजी आन्दोलनका नाममा भएको हिंसात्मक प्रदर्शनले उग्ररुप लिएपछि धेरै आमाहरुको कोख रित्तिएको छ । सयौँ युवाहरु अस्पतालको बेडमा पीडाले छट्पटाइरहेका छन् । ऐतिहासिक संरचना जलेर खरानी भएका छन् ।

आन्दोलन क्रममा भएका तोडफोड, आगजनीले जनतासँग प्रत्यक्ष सरोकार राख्ने प्रहरी सेवा प्रभावित भएको छ । देश र जनताको सुरक्षाका लागि खटिएका सुरक्षाकर्मीहरु बस्ने देशभरका प्रहरी, ट्राफिक प्रहरी कार्यालयदेखि चौकीसम्म तोडफोड तथा आगजनीमा खरानी भएका छन् । प्रहरीका हातहतियार लुटिएका छन् । पोसाकको दुरुपयोग भएको छ । जेलबाट हजारौँ कैदीबन्दी भागेका छन् ।

स्थिति सामान्य बन्दै गएपछि नयाँ सरकार बनेको छ । नागरिकले विस्तारै प्रहरीको खोजी गर्न थालेका छन् । नाना, खाना, छाना खोसिएको प्रहरी भने अभिभावकविहीन बनेको मनोविज्ञानमा बाँचेको छ । यस्तो ज्यादती माओवादीले गरेको १० वर्षे युद्धमा नभोगेको प्रहरी बताउँछन् ।

खबरहबसँग कुरा गर्दै एक जना प्रहरीले भने ‘कार्यालयमै आगो लगाउँदा पोसाकदेखि लिएर खाना पकाउने भाँडाकुँडा समेत गुमाएका छौं ।’ जस्तोसुकै परिस्थितिमा पनि देश र जनताको सुरक्षामा खटिने प्रण गरेकाले चाउचाउ, बिस्कुट खाएर भए पनि आफ्नो धर्म निर्वाह गरिरहेको उनले बताए ।

अहिलेको परिस्थितिले मानसिक रुपमा ठूलो आघात पुगेको उनको भनाइ छ । काठमाडौं उपत्यका प्रहरी कार्यालयका प्रवक्ता शेखर खनाल भन्छन्– ‘हाम्रै सहकर्मीहरुले कति ठाउँमा दुखद मृत्युवरण गरेका छन् । कति घाइते प्रहरीको उपचार भइहरेको छ । त्यस्तो अवस्थामा मानसिक तनाव हुनु स्वाभाविक हो ।’

यस्तो अवस्थामा उपत्यकाभरिका प्रहरी कर्मचारीहरुलाई उपस्थित हुन निर्देशन दिएको र आवश्यक परामर्श दिइरहेको उनले बताए ।

‘हाम्रा भौतिक संरचनाहरु भत्किएहोलान त्यो आफ्नो ठाउँमा छ । तर हाम्रो मन विचलित भएको छैन । विगतमा पनि योभन्दा ठूलाठूला द्वन्द्वबाट हामी गुज्रिसकेका छौँ । कति व्यवस्था नै बदल्ने आन्दोलनमा हामी सहभागी भइसकेका छौँ । यसलाई पनि त्यही प्रकारले लिएका छौँ’ प्रवक्ता खनालले भने ।

अब नयाँ सरकार बनेको छ । त्यसैले आन्दोलनका तिक्तता बिर्सिएर अघि बढ्न आग्रह गर्दै प्रहरीको मनोबल उच्च राख्ने प्रयास भइरहेको उनले बताए ।

ब्यारेकमै बस्ने कर्मचारीहरुको दैनिकीमा पक्कै पनि प्रभाव परेको छ । तर त्यसको व्यवस्थापन चाँडै हुने र अहिले उनीहरुलाई नजिकका प्रहरी युनिट तथा नगरी प्रहरीसंग राखेर व्यवस्थापन गरिएको उनले बताए ।

विषम परिस्थितिमा बिदा लिएर बसेका कर्मचारीहरुलाई समेत काममा बोलाएर उच्च मनोबलका साथ काममा लाग्न आग्रह गरिएको प्रवक्ता खनाल बताउँछन् । आन्दोलनमा प्रदर्शनकारीको प्रहारबाट तीन प्रहरी मारिएका छन् ।

Facebook Comments Box