अम्बिका बस्नेतसहित १० जना थप ५ दिन हिरासतमा, ज्यान मार्ने उद्योगमा अनुसन्धान जारी

काठमाडौं । नेकपा एमालेका सचिव महेश बस्नेतकी पत्नी अम्बिका बस्नेतसहित १० जनालाई थप पाँच दिन हिरासतमा राख्न जिल्ला अदालत काठमाडौंले अनुमति दिएको छ।

ज्यान मार्ने उद्योगसम्बन्धी कसुरमा अनुसन्धान जारी राख्न अदालतले तेस्रो पटक पाँच दिनको म्याद थप गरेको हो। यसअघि पनि अदालतले क्रमशः हिरासत अवधि बढाउँदै आएको थियो।

प्रहरीका अनुसार वैशाख १४ गते माइतीघर मण्डलामा धर्नामा बसेकी शोभा पाठकमाथि कुटपिट भएको घटनामा संलग्न रहेको आरोपमा उक्त समूहलाई पक्राउ गरिएको हो। आरोपितहरूले माइतीघरमै पुगेर पाठकमाथि हातपात गरेको जनाइएको छ।

घटनाका क्रममा अम्बिका बस्नेतमाथि पनि पाठक पक्षका केही पुरुषले हातपात गरेको बताइए पनि ती व्यक्तिहरू हालसम्म पक्राउ पर्न सकेका छैनन्।

कुटपिटबाट घाइते भएकी पाठकलाई उपचारका लागि ट्रमा सेन्टरमा लगिएको थियो। उनको जाहेरीका आधारमा जिल्ला प्रहरी परिसर काठमाडौंले ज्यान मार्ने उद्योगअन्तर्गत घटनाको अनुसन्धान अघि बढाइरहेको जनाएको छ।

प्रहरीले घटनामा संलग्न अन्य व्यक्तिहरूको खोजी कार्यसमेत तीव्र बनाएको छ।

Facebook Comments Box