बागमतीका मेयर थापासँग तीन लाख धरौटी माग

काठमाडौं । बागमती नगरपालिकाका मेयर भरत थापासँग विशेष अदालतले धरौटी मागको आदेश गरेको छ । तेस्रो मुद्दाको लागि अदालतमा उपस्थित भएका उनीसँग तीन लाख रुपैयाँ धरौटी मागको आदेश भएको विशेषका सूचना अधिकारी यज्ञराज रेग्मीले बताए ।

बुधबार थापा हानीनोक्सानीको मुद्दाका लागि उपस्थित भएका हुन् । न्यायाधीशद्वय टेकनारायण कुँवर र रामबहादुर थापाको इजलासले थुनछेक आदेश गर्दै धरौटी मागको आदेश गरेको हो । थापामाथि पछिल्लोपटक ४ जेठमा भ्रष्टाचारको तेस्रो मुद्दा दायर गरेकोमा एक महिनापछि उनी उपस्थित भएका हुन् ।

थापाविरुद्ध पहिले नै भ्रष्टाचारका दुई मुद्दा विशेषमा विचाराधीन छन् । अख्तियार दुरुपयोग अनुसन्धान आयोगले हानीनोक्सानी र गैरकानुनी सम्पत्ति आर्जनका गरी दुई मुद्दा दायर गरिसकेकोमा बिहीबार यी दुवै मुद्दामा पेसी तोकिएको छ । पछिल्लोपटक यी मुद्दामा प्रमाण बुझ्ने आदेश भएको थियो ।

अख्तियारले सागरनाथ वन विकास परियोजना अतिक्रमण गरी गैरकानुनी रूपमा वन पैदावार उत्खनन गरेको अभियोग उनीमाथि लगाएको छ । यस मुद्दामा थापाका साथै मधेश प्रदेशका तत्कालीन अर्थमन्त्री विजय कुमार, नगर उपप्रमुख लीलाकुमारी मुक्तान, प्रशासकीय अधिकृत विमलकुमार पोखरेल, प्रदेश कानुन मन्त्रालयका कानुन अधिकृत गोकुल भुजेल, नगरपालिकाका इन्जिनियरहरू निजञ्जन लामिछाने र सागर पौडेल र लेखा अधिकृत विश्वराज पोखरेल प्रतिवादी छन्।

Facebook Comments Box