धनगढीमा अन्तर्राष्ट्रिय स्तरको क्रिकेट रंगशाला बनाउने प्रेम आलेको प्रतिबद्धता

नेपाल–भारत–चीन जोड्ने त्रिदेशिय सडकलाई छिटोभन्दा छिटो सम्पन्न गराइने

काठमाडौँ ।

कैलाली क्षेत्र नं. ५ मा नेपाली कम्युनिष्ट पार्टीका उम्मेदवार प्रेम बहादुर आलेले धनगढीको फाप्लामा अन्तर्राष्ट्रिय स्तरको क्रिकेट रंगशाला निर्माण गरी धनगढीलाई क्रिकेट हवको रूपमा विकास गर्ने प्रतिबद्धता गरेका छन् । उनले धनगढी विमानस्थलको धावनमार्गलाई विस्तार गरी २५०० मिटर पुर्याउने पनि प्रतिबद्धता गरेका छन् । आलेले शहिद दशरथ चन्द स्वास्थ्य विज्ञान विश्व विद्यालयलाई ३०० देखि ६०० शैय्याको अस्पताललाई यथाशिघ्र सञ्चालन गरी एमबिबिएस अध्ययन अध्यापनको सुरुवात गराउने पनि उनको प्रतिबद्धता छ । सेती प्रादेशिक अस्पतालबाट विशिष्टिकृत सेवाहरू प्रदान गर्न संघीय सरकार मातहत सञ्चालन गर्ने व्यवस्था मिलाइने बताइएको छ ।

त्यस्तै, धनगढी–खुटीया–दिपायल–बझाङ चैनपुर हुदैँ उरै भन्ज्याङ सम्मको नेपाल–भारत–चीन जोड्ने त्रिदेशिय सडकलाई छिटो भन्दा छिटो सम्पन्न गराउन पहल गर्ने पनि उनको प्रतिबद्धता छ । मोहना, खुटीया, घुरही, घुराहा र शिवगंगा नदी किनारका खेती योग्य जमिन तथा बस्तीहरूलाई सुरक्षित बनाउन दिर्घकालिन तटबन्धन निर्माण गरी धनगढी क्षेत्रको डुबान समस्याको समाधान गर्ने पनि उनको योजना छ ।

धनगढ़ी वडा नं. ७ मा रहेको बनस्पति उद्यान र जाखोर ताललाई धार्मिक तथा पर्यटकीय स्थलको रूपमा विकास गर्ने बताइएको छ । धनगढी चटकपुरमा रहेको नेपाल आयल निगमको डिपोले मानव बस्तीको सुरक्षालाई उच्च जोखिममा पारेकोले सो स्थानबाट स्थानान्तरण गरी सुरक्षित स्थानमा राख्न पहल गरिने पनि प्रतिबद्धता गरिएको छ ।

Facebook Comments Box